Divizioni Civil i Gjykatës Themelore në Prishtinë ka aprovuar pjesërisht padinë e paditësit M.S, në rastin ku i njëjti ka paditur vëllain e tij B.S, nga i cili po kërkon vërtetimin e pronësisë.

Përmes aktgjykimit të datës 10 nëntor 2023, Themelorja ka aprovuar pjesërisht kërkesëpadinë e paditësit- kundër paditurit M.S, duke vërtetuar se i njëjti në bazë të kontributit dhe ndarjes së pasurisë së përbashkët është pronar me 1/1 i pasurisë së paluajtshme në pronat e cekura në aktgjykimin e gjykatës, raporton “Betimi për Drejtësi”.

Sipas këtij vendimi është refuzuar kërkesëpadia e paditësit- kundër të paditurit M.S përmes së cilës ka kërkuar që të vërtetohet se në bazë të kontributit dhe ndarjes së pasurisë familjare është pronar i ngastrave kadastrale të cekura si në aktgjykim.

Përmes këtij vendimi është refuzuar si e pabazuar kërkesëpadia e paditësit- kundërpaditurit M.S përmes së cilës ka kërkuar që të detyrohen të paditurit që të njëjtit në mënyrë solidare në emër të pjesës prej ¼ që i takonte në njësinë kadastrale 495-0 ZK t’i paguajnë shumën prej 59 mijë e 670 euro në afat prej 15 ditësh nga plotfuqishmëria e aktgjykimit.

Ndërkaq, përmes këtij vendimi është aprovuar pjesërisht kërkesa e ndërhyrësit A.S ashtu që është vërtetuar se ndërhyrësit A.S. në bazë të ndarjes së pasurisë së përbashkët është pronar me 1/1 i pasurisë së paluajtshme të paraqitura në vendim të gjykatës.

Sipas këtij vendimi është refuzuar në tërësi si e pabazuar kërkesëpadia e ndërhyrësit A.S përmes së cilës ka kërkuar që të detyrohet i padituri kundërpaditësi B.S që të njëjtit t’i paguajë shumën prej 59 mije e 670 eurove për njësinë kadastrale që i takonte.

Gjykata përmes këtij vendimi ka refuzuar kërkesëpadinë e të paditurit- kundër paditësit B.S dhe ndërhyrësve kryesor K.M,M.M, V.G.dhe M.S përmes së cilës kanë kërkuar të shpallet nule kontrata mbi shitblerjen e paluajtshmërisë të lidhur me 15 korrik 2001.

Gjykata me anë të këtij vendimi ka detyruar të paditurin- kundër paditësin B.S dhe ndërhyrësit kryesor K.M, M.M, V.G M.S që t’i lejojnë që paditësi dhe ndërhyrësi të regjistrohen në librat kadastral si pronar i paluajtshmerivë lidhur me pronat në të cilat iu janë njohur të drejtat me këtë aktgjykim dhe  njëjti paraqet titull ekzekutiv.

Në arsyetimin e vendimit thuhet se gjykata bëri vlerësimin e secilës provë veç e veç dhe të gjithave së bashku dhe mbështetur në dispozitën e nenin 8 të LPK-së e aprovoi pjesërisht kërkesë padinë e M.S dhe ndërhyrësit A.S dhe vendosi si në dispoztiv të këtij aktgjykimi, ndërsa refuzoi si të pa bazuar kërkesëpadinë e të paditurit/kundër paditësit B.S dhe ndërhyrësve K.M, M.S M.M dhe V.G.

Ndryshe, sipas padisë së 14 tetorit 2003, paditësi M.S ka paditur B.S (vëllanë e tij) dhe po kërkon vërtetimin e pronësisë, duke u bazuar në certifikatën mbi të Drejtat e Pronës së Paluajtshme i padituri evidentohet si pronar dhe i ngastrave kadastrale në vendin e quajtur “Vishe Sella” në sipërfaqe prej 10,046 m2 dhe të ngastrës kadastrale në sipërfaqe prej 23,090 m2.

Mirëpo, në padi thuhet se ngastrat kadastrale të lartcekura, nuk janë vetëm pronë e të paditurit, por janë pronë e përbashkët edhe e vëllezërve A. dhe B.S., pasi është krijuar me punën e përbashkët të katër vëllezërve, ndërsa përkundër kësaj i padituri nga këto dy ngastra i ka shitur 3000 m2 pa u konsultuar edhe me vëllezërit tjerë me qëllim të përfitimit personal.

Andaj, mbi këtë bazë paditësi kërkon nga gjykata që të aprovohet si e bazuar padia dhe kërkesëpadia e tij, po ashtu edhe të vërtetohet se paditësi në bazë të kontributit me punë dhe të siguruara derisa ka qenë në bashkësi familjare me të paditurin dhe vëllezërit tjerë, ka të drejtën e pronësisë në pjesën prej ¼ të paluajtshmërive kontestuese dhe që të njëjtat të regjistrohen në emër të paditësit në Zyrën Kadastrale të Komunës së Obiliqit.

Po ashtu, paditësi përmes padisë kërkon edhe që të obligohet i padituri që t’ia paguajë të gjitha shpenzimet procedurale. /BetimipërDrejtësi

BKT Kosova vlerësohet për herë të tretë "Banka e Vitit 2023 në Kosovë" nga The Banker

Sponsoruar