Është vendosur, zgjedhjet në 4 komunat veriore do të shtyhen
Autori: Gazeta inFokus 18:36 | 09 December 2022
Zgjedhjet e paralajmëruar për 18 dhjetor për kryetarë komunash dhe me 25 dhjetor për Kuvendet Komunale në Mitrovicën Veriore, Zevçan, Zubin Potok dhe Leposaviç do të shtyhen.
Albanian Post ka kuptuar nga burimet diplomatike se Kosova i është bindur kërkesës ndërkombëtare dhe do heqë dorë nga mbajtja e zgjedhjeve atje.
Lajmi zyrtarisht do të bëhet i ditur në fillim të javës së ardhshme, me shumë gjasë të martën, kur edhe krerët e Kosovës takohen me Këshilltarin e Departamentit Amerikan të Shtetit, Derek Chollet, i cili viziton Ballkanin nga 11 deri me 17 dhjetor.
Kërkesa ekskluzive e Chollet ishte shtyrja e zgjedhjeve, meqë SHBA konsideron se nuk ka kushte për mbajtjen e zgjedhjeve.
Ky shpjegim, pra mospasja e kushteve, do të ofrohet edhe si arsyetimi i presidentes së Kosovës, Vjosa Osmani, për shtyrje deri në një moment të përshtatshëm.
Rekomandimin do ta bëjë Komisioni Qendror i Zgjedhjeve në raportin që do ta pranojë presidentja.Albanian Post ka pyetur këshilltarin për media të Osmanit, Bekim Kupinën, por ai ka deklaruar se ende nuk e kanë pranuar.
“Ne jemi në pritje të këtij raportit nga KQZ-ja”, deklaroi Kupina.
Cila është procedura?
Fillimisht bëhet vlerësimi i gjendjes së sigurisë në terrenin ku supozohet të mbahen zgjedhjet.
Ky vlerësim prezantohet në Komisionin Qendror të Zgjedhjeve.
Më pas KQZ-ja merr një vendim dhe atë ia çon presidentes së vendit në formë të raportit.
Osmani pastaj fton në Presidencë për diskutim përfaqësuesit e partive politike ku u shpaloset raporti.
Pas konsultimeve, arrihet një konsensus për vendimin dhe shpallet vendimi për shtyrje.
Përveç në kohën kur zgjedhjet në disa komuna ishin shtyrë për shkak të rrezikut nga pandemia, asnjëherë nuk ka ndodhur që ato të mos mund të mbahen, për shkak të mungesës së sigurisë.
Por, se në komunat veriore nuk ka mundësi për zgjedhje ishte thënë qysh nga momenti kur presidentja kishte shpallur datën.
Albanian Post me 15 nëntor kishte raportuar se si rrezikohet të humben 556 mijë e 482 euro, aq sa janë ndarë për organizimin e zgjedhjeve të jashtëzakonshme, meqë vështirë se do të ketë kushte për mbajtjen e zgjedhjeve.
Përveç Listës Serbe, partisë më të madhe brenda komunitetit serb, që e ka qëndrim zyrtar se nuk merr pjesë, pothuajse asnjë nga partitë tjera serbe nuk e kishte ndërmend të garonte.
As ato që i bëjnë opozitën kryesore Listës Serbe në Veri.
Pas shtyrjes së vendimit për qortimin dhe gjobitjen e atyre që vozisin vetura me targa ilegale, shtyrja e datës së zgjedhjeve përbën herën e dytë që institucionet e Kosovës marrin një vendim dhe më pas nuk e zbatojnë atë.
Në të dyja rastet, ka pasur kërkesë ndërkombëtare për moszbatim, për shkak të situatës së tensionuar në terren.
Gjithashtu, është hera e dytë që liderët institucionalë këmbëngulin se do të procedojnë përkitazi me vendimet që marrin dhe në fund tërhiqen nga të njëjtat vendime.
Situata në veri vazhdon të jetë e tensionuar, derisa të enjten në mbrëmje është plagosur edhe një polic i Kosovës.
Kjo nuk është hera e parë që është sulmuar një patrullë e policisë prejse janë rritur tensionet, fillimisht për shkak të zbatimit të vendimit të sekuencuar për targat, por është hera e parë që është plagosur një pjesëtar i forcave të rendit.
Deri më tani – përkundër se ka pasur në disa raste të shtëna me armë, hedhje të shok bombave e vënie flake të veturave të banorëve serbë që vendosnin t’i zëvendësojnë targat në RKS, ashtu siç ua kërkonte policia – nuk ka pasur asnjë të arrestuar.
Arsyeja përse Policia e Kosovës shtoi prezencën në Veri, siç e ka shpjeguar edhe vetë ministri i Punëve të Brendshme, Xhelal Sveçla, ishte pasiguria e qytetarëve të Kosovës në atë zonë prejse janë rritur tensionet, por edhe për të konsoliduar radhët pas momentit kur një grup me maska e i armatosur zmbrapsi policët bashkë me zyrtarët zgjedhorë komunalë, që provonin të kenë qasje në zyrat e tyre dhe të punojnë.
Grupet kriminale në Veri nuk duan që ata zyrtarë të vazhdojnë punën, sepse me direktiva të Listës Serbe, ata nuk duan as mbajte të zgjedhjeve me 18 e 25 dhjetor, pasi serbët vendosën të djegin mandatet dhe të tërhiqen nga çdo nivel institucional e politik.
Situata jostabile dhe me prezencë të krimit të organizuar në Veri vazhdon qysh nga viti 2000, por tensionet u shtuan, kur qeveria provojë të zbatojë marrëveshjen e vitit 2013 për targat ilegale.
Lista Serbe, si fuqia politike më e madhe nga komuniteti serb, doli nga institucionet me kërkesën që të anulohet vendimi.
Qeveria, pas thirrjeve nga aleatët ndërkombëtarë, pranoi ta shtyjë vendimin, me shpresë se i hap rrugë bisedimeve për zgjidhje përfundimtare, por serbët nuk u kthyen më në institucione.
Tani, po me kërkesë ndërkombëtare, do shtyhen edhe zgjedhjet, por sërish, vështirë se serbët kthehen në institucione, derisa vakumi institucional atje vazhdon.
Të tjera
-
Mbrojtja propozon të kryhet ekspertizë e re psikiatrike ndaj të akuzuarit për vrạsjen e vëllait
Në seancën e së premtes në Gjykatën Themelore në Mitrovicë, mbrojtësja e të a...
-
Sarrazin i kërkon Qeverisë t’i heq masat ndaj mallrave serbe, flet për pasoja të rënda në rast të refuzimit
Manuel Sarrazin, emisar i Gjermanisë për Ballkanin Perëndimor ka bërë një ana...
-
Gjermania hap dyert për 250 mijë emigrantë të këtij vendi
Gjermania do të hapë dyert për 250 mijë punëtorë kenianë të kualifikuar dhe g...
-
“Qëllimi jonë është Islamizimi i Kosovës e Preshevës. Unë nuk jam shqiptar”, hoxha nga Sanxhaku me deklaratë të rrezikshme
Një hoxhë nga Sanxhaku, që flet shqip ka mbajtur sot një tubim në Luginën e P...
-
Lista preliminare e provimit për prokurorë të shtetit
Këshilli Prokurorial i Kosovës shpall listën preliminare të provimit të kandi...
-
REL: Kosova dhe Serbia kanë konfirmuar pjesëmarrjen në takimin e 17 shtatorit
Burimet e Radios Evropa e Lirë në Bashkimin Evropian kanë thënë se presin që ...
-
Ra nga kati i tretë i objektit ku punonte, vdes 48 vjeçari në Prizren
Një person ka vdekur sot në vendin e tij të punës. Rasti ka ndodhur në Pri...
-
Parlamentari serb: Vuçiq shpalli kapitullimin në Kosovë
Deputeti opozitar në Parlamentin e Serbisë, Zdravko Ponosh, ka reaguar pas ko...
-
Haziri pas konferencës së Vuçiqit: Kosova mos të bie në hendekun e Serbisë
Nënkryetari i LDK-së, Lutfi Haziri, ka reaguar pas konferencës që mbajti pres...
-
Incidenti në veri, kthehen afishet, tash pro-Radoiçiqit
Sikur fotografia, me kujdes janë zgjedhur edhe fjalët. Kryeterroristit Mil...
-
Kurti me videolidhje pjesë e panelit ku ishte edhe Lajçak – akuza Vuçiqit se e përdor Kosovën dhe Bosnjën për të siguruar lëshime nga Perëndimi
Gjatë paradites së 13 shtatorit, kryeministri i Kosovës, Albin Kurti, me vide...
-
Përkundër që ndau rrugët me Vetëvendosjen, Fatmir Humolli përkrah qeverisë për veriun
Deputeti Fatmir Humolli ka një kohë që i ka ndarë rrugët me Lëvizjes Vetëvend...