Sport

Drita ka rast të ‘artë’ ndaj Vëllaznimit

Autori: Gazeta inFokus 11:31 | 18 March 2018

Drita e ka mundësinë që sot të rikthehet në pozitën e parë të Vala Superligës së Kosovës në futboll, kjo pas humbjes që Prishtina e pësoi dje nga Drenica.

Për ta rimarrë kreun e renditjes, gjilanasit duhet të fitojnë në udhëtimin në Gjakovë, kundër Vëllaznimit që sivjet po tregohet pengesë e pakalueshme për Dritën.

Trajneri, Bekim Isufi pret ndeshje të fortë, por edhe beson në rezultat pozitiv. “Bëhet fjalë për një ndeshje të rëndësishme për të dyja palët, por që mendoj se presioni është në anën e tyre, duke marrë parasysh pozitën e Vëllaznimit në tabelë”, ka thënë Isufi.

-Advertisement-

Sa i përket mundësisë për t’u rikthyer në pozitën e parë, trajneri i bardhekaltërve thotë se skuadra e tij nuk është e ngarkuar me këtë synim. “Ne do të punojmë në vazhdimësi dhe të shkojmë hap pas hapi, duke mos u ngarkuar me gjendjen në tabelë. Pra, tani mendojmë vetëm për ndeshjen me Vëllaznimin, një rival mjaft cilësor dhe i cili në pjesën pranverore po paraqitet shumë mirë. Megjithatë, në Gjakovë shkojmë për të shfaqur lojën tonë dhe optimistë se do të kthehemi me rezultat pozitiv”, ka shtuar Isufi.
Para ndeshjes së sotme, Drita renditet e dyta me 41 pikë, dy më pak se Prishtina që e ka një ndeshje më shumë të zhvilluar. Ndërsa, Vëllaznimi renditet në pozitën e nëntë me 31 pikë, pesë më pak se Drenica që është e teta, por me një ndeshje më shumë.

Subscribe në YouTube: GAZETA INFOKUSI