Lajme

Drejtori i PDK-së në Komunën e Gjilanit flet për “mashtrimet e LVV-së”

Autori: Gazeta inFokus 13:21 | 04 October 2022

Drejtori i Financave në Komunën e Gjilanit, Riad Rashiti, i cili vjen nga radhët e PDK-së ka thënë se vetëm me PDK-në në qeverisje, janë bërë punë të mëdha dhe ndryshime pozitive për qytetarët e Kosovës.

Reagimi i tij vjen pasi LVV-ja publikoi një video të hënën ku akuzoheshin ish-krerët politikë për “krim e korrupsion”, teksa shtoi se PDK nuk do të ndalet asnjëherë dhe nuk nund ta ndalojë askush.

“Me kryetarin Memli Krasniqi, PDK-ja duhet dhe do të kthehet në vendin ku i takon, si partia më e fuqishme dhe me vizionin më të qartë politik dhe ekonomik për vendin tonë. Ne jemi krenar për të kaluarën tonë, për liderët tanë, me Presidentin Hashim Thaçi, një njeri që ka shënuar epokë historike, si dhe Kadri Veselin, një njeri që e ka mbajtur atë epokë si mision, e që ata sot padrejtësisht po përballen me një proces gjyqësor mbi pretendime e akuza të shpifura”, shkroi ai.

-Advertisement-

Ai foli edhe për mashtrimet e LVV-së ndër vite.

Megjithatë, ende nuk dihet nëse do të ketë prishje të koalicionit mes PDK-së dhe LVV-së që udhëheqin së bashku në Komunën e Gjilanit.

“Nuk do të lejojmë që këtë rrëfim ta shtrembërojë dhe ta errësojë askush, e aq më pak VV përmes mashtrimeve të saja që në vazhdimësi ia ka bërë qytetarëve të Kosovës, sepse gjithçka është e qartë si drita, për ata që kanë sy. Të arriturat në këtë vend janë të matshme, të prekshme, reale dhe diçka që i ka përjetuar dhe prekur secili”, shkroi Rashiti në Facebook.

“Sot, për fat të keq, të gjitha këto arritje po rrezikohen me qëllim të keq, nga mentaliteti mohues dhe mosmirënjohjes i qeverisjes aktuale, duke e rrezikuar edhe vetë perspektivën e qytetarit dhe shtetit të Kosovës”.

“Por, jemi të bindur se gabimi i qytetarëve të Kosovës, më asnjë herë nuk do të përsëritet. Ne besojmë dhe të angazhohemi maksimalisht si PDK, që në këtë vend të kthehet besimi në institucione dhe shpresa për të jetuar në shtetin e Kosovës”, përfundoi ai.

Subscribe në YouTube: GAZETA INFOKUSI