Të gjitha lëndët e pazgjidhura në Divizionin e Apelit në Mitrovicën Veriore janë bartur në Gjykatën e Apelit në Prishtinë.

Bartja e këtyre lëndëve te kolegjet e rregullta të Gjykatës së Apelit ka ndodhur shkaku i dorëheqjeve të gjyqtarëve dhe stafit administrativ të komunitetit serb në sistemin e drejtësisë, raporton “Betimi për Drejtësi”.

“Në Gjykatën e Apelit – Divizioni në Mitrovicë, numri i lëndëve të pazgjidhura nga lëmia penale është 27 lëndë, ndërsa nga lëmia civile janë 160 lëndë. Të gjitha këto lëndë janë bartur në Gjykatën e Apelit në Prishtinë”, thuhet në përgjigjen e Blendë Mjekut, bashkëpunëtore Profesionale në Zyrën e Kryetarit të Gjykatës së Apelit.

Në Gjykatën e Apelit – Divizioni në Mitrovicën e Veriut, kanë punuar katër gjyqtarë nga radhët e komunitetit serb, të cilët kanë dhënë dorëheqje, së bashku me të gjithë gjyqtarët dhe stafin administrativ nga radhët e komunitetit serb në Gjykatën Themelore në Mitrovicë.

Më 7 nëntor 2022, dorëheqjet i kanë dorëzuar edhe prokurorët dhe stafi administrativ në Prokurorinë Themelore në Mitrovicë, raporton “Betimi për Drejtësi”.

Po ashtu dorëheqje ka dhënë edhe një gjyqtar i komunitetit serb në Gjykatën e Apelit.

Dorëheqjet po vazhdojnë të shqyrtohen në Këshillin Gjyqësor dhe në Këshillin Prokurorial por ende s’ka një vendim final.

Sipas Marrëveshjes Kosovë-Serbi për Gjyqësorin, e arritur në Bruksel në vitin 2015, objekti i Gjykatës Themelore në Mitrovicën e Veriut do të përbëhet edhe nga Njësiti i Gjykatës së Apelit në Mitrovicë, i cili do të përbëhet nga 5 gjyqtarë serbë të Kosovës dhe 2 gjyqtarë shqiptarë.

Largimi i pjesëtarëve të komunitetit serb nga institucionet e Kosovës, ka ardhur pas vendimit për suspendimin e drejtorit të Policisë së Kosovës për rajonin e veriut, Nenad Gjuriq, i cili kishte refuzuar që të zbatojë vendimin e Qeverisë për qortimin e vozitësve me targa ilegale të qyteteve të Kosovës të lëshuara nga Serbia prej para vitit 1999.

Pas dorëheqjeve edhe të kryetarëve të komunave veriore ishin shpallur zgjedhjet lokale që më vonë ishin shtyrë. Pastaj ishte arrestuar ish-polici Dejan Pantiq si i dyshuar për sulm ndaj Komisionit Komunal Zgjedhor. Një pjesë e serbëve kishin vendosur barrikada nëpër rrugët e veriut të Kosovës. Mirëpo, Largimi i barrikadave të vendosura më 10 dhjetor kishte nisur më 29 dhjetor pasi ish-polici i dyshuar për terrorizëm, Dejan Pantiq u lirua nga paraburgimi dhe iu vendos masa e arrestit shtëpiak./BetimipërDrejtësi

BKT Kosova vlerësohet për herë të katërt "Banka e Vitit 2024 në Kosovë" nga The Banker

Sponsoruar