Lajme

Digjen billbordet “Liria ka Emër” në Graçanicë

Autori: Gazeta inFokus 08:52 | 17 November 2020

Dy billbordeve me mbishkrimin “Liria ka Emër” që u vendosën një ditë më parë në komunën e Graçanicës u është vënë zjarri gjatë natës.

Sic shihet në fotografi ato janë dëmtuar dhe kjo vjen pas kundërshtimeve që u bënë një ditë më parë nga përfaqësues të komunitetit serb në këtë komunë dhe udhëheqësit komunal, shkruan Gazeta inFokus.

“Billbordi me emblemën e UÇK-së, i cili u vendos në afërsi të Graçanicës nga drejtimi i Gjilanit, nuk ka për qëllim pajtimin, por provokimin”, ka deklaruar kryetari i komunës së Graçanicës Sërgjan Popoviq për Kosova Online një ditë më parë.

Sipas tij tabela u vendos jo shumë larg shtëpive të familjeve serbe në vendbanimin e Kishnicës.

“Ne i bëmë thirrje komunitetit ndërkombëtar të përdorë autoritetin e tij në mënyrë që gjëra të tilla të mos ndodhin. Nesër do të kemi takime me të gjitha strukturat e sigurisë dhe do t’u tregojmë atyre se cili është problemi dhe si ta heqim atë billbord”, ka pretenduar Popoviq.

Billbordet, me mesazhin “Liria ka emër” të shkruar pranë emblemës së UÇK-së, janë vendosur në të gjithë Kosovën. Shumica e tyre janë vendosur në rrugët që çojnë në Prishtinë, në të cilat komuna e Graçanicës mbështetet territorialisht.

“Unë jam kryetar i komunës së Graçanicës dhe kjo është një komunë serbe. Detyra ime është të dëgjoj dhe të flas me popullin tim. Kam marrë shumë thirrje dhe kam dëgjuar se ata janë dukshëm të shqetësuar për shkak të gjithë kësaj”, ka pretenduar Popoviq.

Ky reagim i Popoviqit edhi menjëherë pasi një ditë më parë, shefi i tij, drejtori i të ashtuquajturës zyre serbe për Kosovën, Petar Petkoviq u ankua për vendosjen e këtij billbordi në afërsi të Graçanicës, duke pretenduar se “ky është kërcënim i hapët për serbët”.

Për emblemën e UÇK’së, nga Serbia ka reaguar shefi i zyrës së ashtuquajtur për Kosovë, Petar Petkoviq. Sipas tij, kjo e kërcënon sigurinë e serbëve në Kosovë./Gazeta Infokus/

Të tjera