Lajme

Dalje masive në Prishtinë në orët e lëvizjes, IKSHPK thirrje qytetarëve: Vëni gishtin në kokë, shikoni çka po ndodh në Europë

Autori: Gazeta inFokus 22:44 | 26 March 2020

Instituti Kombëtar i Shëndetësisë Publike të Kosovës ka njoftuar se janë konfirmuar edhe 7 raste të reja me koronavirus në Kosovë, duke e çuar kështu në 86 numrin e të infektuarve, pasi që gjatë ditës ishin konfirmuar edhe 8 raste të tjera.

Nga IKShPK-ja thonë se në orët e lëvizjes në Prishtinë, ka pasur dalje masive, teksa i ka ftuar qytetarët për kujdes, në të kundërtën mund të shkaktohet shpërthim epidemik në kryeqytet.

“Në Prishtinë po vërehen dalje masive në orët e lira të lëvizjes. Grumbuj të njerëzve që po rrezikojnë veten dhe të gjithëve! Ju lutem kini kujdes se mund të shkaktoni shpërthim epidemik në kryeqytet! Shikoni ju lutem valën epidemike në shtetet e Europës, veni gishtin në kokë dhe mendoni. Mos pengoni ekipet e Institutit me pyetje të cilat i keni mësuar tashmë nga rekomandimet e Instituti Kombëtar dhe Ministrisë së Shëndetësisë. Na ndihmoni ta kryejmë punën sublime por mundohuni të zbatoni secili detyrën e juaj duke ruajtur shëndetin tuaj. Ju kemi lënë të pushoni dhe jo secili të marr detyrën e epidemiologut duke pyetur detaje, duke u munduar të rikonstruktojnë çdo vatër infeksioni, duke u zhytur në kurreshtjen e njohjes së çdo procedure të hulumtimit. Pushoni dhe vetëm pushoni që të na lini të punojmë!Ju gjendeni në shtëpitë e juaja me familiar. Ne akoma gjendemi në punë pa orar nga 15-20 orë! Për ju! E ju për ne: JU LUTEMI QËNDRONI NË SHTËPI!”, thuhet në apelin e IKSHP.

Të tjera