Lajme

Çfarë mesazhe sollën amerikanët në Kosovë?

Autori: Gazeta inFokus 09:21 | 26 April 2022

Brenda pesë ditëve Kosovën e vizituan dy delegacione amerikane, të cilët përçuan mesazhe të qarta për krerët e shtetit.

Dje ishte, Ndihmëssekretarja amerikane për Çështjet Evropiane dhe Euroaziatike, Karen Donfried, ajo e cila në një konferencë për media pas takimit me presidentin Vjosa Osmani, ka thënë se është urgjente të punohet që Kosova ta sigurojë vendin e saj në institucionet evropiane dhe euroatlantike.

Ndërsa, pas takimin me kryeministrin Albin Kurti, Donfried ka theksuar se Kosova dhe Serbia urgjent duhet të riangazhohen në dialogun e lehtësuar nga BE.

”SHBA duan që ta shohin Kosovën duke marrë vendin e vet të duhur në institucionet europiane dhe euroatlantike. Për këtë çështje ne i japim kaq shumë prioritet mbështetjes së dialogut të lehtësuar nga BE-ja për ta ndihmuar Kosovën që të arrijë në marrëdhënie të normalizuara, të qëndruara, me njohje të dyanshme me fqinjin tuaj Serbinë”.

“Sepse status quo është e paqëndrueshme, jo vetëm që e pengon të ardhmen e Kosovës dhe të Serbisë drejt Europës, por i bën të mira Kremlinit. Sepse Rusia dëshiron të shkatërrojë çdo unitet, dhe konsolidim demokratik në shtetet e Ballkanit Perëndimor, duke siguruar që ju dhe shtetet fqinje të mos integroheni në institucionet europiane dhe euroatlantike”, ka thënë Karen.

Në vizitën e djeshme bashkë me Donfried ishte edhe zëvendës Ndihmës Sekretarin për Çështje Evropiane dhe Euroaziatike, Gabriel Escobar. Ata sot do të vizitojnë edhe Serbinë ku do të takohen me presidentin serb, Aleksandar Vuçiq dhe kryeministren Ana Bërnabiq, kurse ditëve të tjera do të shkojnë në Mal të Zi, Shqipëri, Maqedoni të Veriut dhe Bosnje Hercegovinë.

Të enjten e javës së kaluar, Kosovën e vizituan tre senatorë amerikanë Chris Murphy, Jeanne Shaheen dhe Thom Tillis, të cilët patën takime me drejtuesit e institucioneve shtetërore. Po ashtu, edhe gjatë kësavizite të amerikanëve u theksua përkrahja e rrugës euroatlantike të vendit tonë, si dhe u fol edhe për procesin e dialogut.