Besnik Mujeci, asamblist i Lëvizjes Vetëvendosjes në Komunën e Prishtinës, si dhe katër bashkëpunëtorët e tij, një nga Kosova e tre nga Shqipëria, do të qëndrojnë në burg pa afat.

Kështu ka vendosur sot Gjykata Penale e Tiranës për pesë të arrestuarit dy ditë më parë në operacionin e antidrogës, ku u sekuestruan 11.300 doza të drogës së llojit ekstazi.

Përpos Mujecit, i arrestuar nga Kosova është Mithat Ramadani.

Lidhur me mandatin e tij si asamblist në Komunën e Prishtinës ka folur Eugen Cakolli, hulumtues i lartë nga KDI.

Ai shpjegon se Mujeci mund ta humbasë mandatin e tij nëse ofron dorëheqje, ndërsa rrethanat tjera për humbjen e mandatit nga ai përfshijnë dënimin për vepër penale, me burgim mbi gjashtë muaj, apo mospjesëmarrjen në mbledhjet e Kuvendit Komunal në tri raste të njëpasnjëshme.

“Pavarësisht shqiptimit të masës së paraburgimit dhe natyrës së veprave penale për të cilat dyshohet Besnik Mujeci, dispozitat e ligjit për vetëqeverisjen lokale nuk parashohin marrjen automatike të mandatit të tij. Besnik Mujeci ta humbasë mandatin aktual, me efekt të menjëhershëm, vetëm në rast se ai ofron dorëheqje nga kjo pozitë. Rrethanat tjera për humbjen e mandatit, që parashihen me legjislacionin në fuqi, përfshijnë dënimin për vepër penale, me burgim mbi gjashtë muaj, apo mospjesëmarrjen në mbledhjet e Kuvendit Komunal në tri raste të njëpasnjëshme”, thekson Cakolli.

Tutje, ai potencon se nëse ai qëndron në burg në Shqipëri ose Kosovë derisa Kuvendi Komunal i Prishtinës i mban tri mbledhje, ku ai nuk është i pranishëm, atëherë iniciohet zëvendësimi i tij.

“Në këtë drejtim, në rast se Besnik Mujeci do të qëndrojë në masën e paraburgimit në Shqipëri, apo edhe nëse një masë e tillë do të zbatohet në Kosovë, përgjatë kohëzgjatjes së kësaj mase Kuvendi Komunal i Prishtinës do të mbajë tri mbledhje – ku konstatohet mosprania e tij – atëherë iniciohen procedurat për zëvendësimin e tij nga Kryesuesi i Kuvendit të Komunës. Mundësia e fundit është që, në rast se Besnik Mujeci do të dënohet me vendim të formës së prerë për veprat penale me të cilat ai ngarkohet, me burgim prej mbi 6 muajsh, atij do t’i humb mandati”, thotë ai për Gazeta Blic.

Cakolli thekson se Mujeci duhet të ofrojë dorëheqje, për shkak të cenimit serioz që i bëhet mandatit kushtetues të Kuvendit Komunal të Prishtinës.

“Sidoqoftë, bazuar në parimet e funksionimit demokratik të institucioneve dhe integritetit të tyre, anëtari në fjalë duhet të ofrojë dorëheqjen e tij, për shkak të cenimit serioz që i bëhet mandatit kushtetues të Kuvendit Komunal të Prishtinës, kur një anëtar i tij është i dyshuar dhe arrestuar për vepra të tilla penale”, deklaron hulumtuesi i lartë nga KDI, Eugen Cakolli.

Ndryshe, Lëvizja Vetëvendosje të njëjtën ditë që Besnik Mujeci është arrestuar në Shqipëri, ka marrë vendim që ta përjashtojë nga partia.

Përpos Mujecit e Ramadanit, në burg do të qëndrojnë në burg deri në fund të hetimeve edhe tre bashkëpunëtorët e tyre nga Shqipëria, Kalem Picari, Ambra Myftari dhe Daniel Avdia.

Shkëlqim Devolli dhe Adriatik Kelmendi e presin ambasadorin amerikan, Jeff Hovenier

Sponsoruar