Ballkani e ka mposhtur Feronikelin me rezultat minimal 1-0, në sfidën e vlefshme për xhiron e 20-të në elitën e futbollit kosovar, shkruan Gazeta inFokus.

Në takimin e zhvilluar në stadiumin e qytetit në Suharekë, golin e vetëm për vendasit e realizoi sulmuesi gjilanas, Mirlind Daku, në minutën e 81’.

Pas ndeshjes ka folur trajneri i ‘portokallinjve’, Bledi Shkëmbi, i cili ka thënë se kanë fituar një ndeshje të vështirë.

“Kemi mbyllur një ndeshje të vështirë, por kemi për ta bërë edhe me dy të tjera, të cilat janë shumë afër me kohën dhe ne duhet të përgatitemi për to. Do të shohim gjendjen e futbollistëve që kemi dhe më pas do i’a lëjmë kohës”, deklaroi fillimisht Shkëmbi.

Tutje tekniku nga Shqipëria ka theksuar se qëllimi kryesor i tij me Ballkanin është të dalin në Evropë.

“Marrëveshja ime me Ballkanin është të bëjmë maksimumin dhe me dëshirën më të madhe për të hyrë në Evropë. Nuk diskutohet se të dalësh kampion është shumë mirë, por ne qëllimin kryesor e kemi Evropën. Megjithatë, ne do të punojmë shumë dhe do të luftojmë për të dalë kampion deri në ndeshjen e fundit”, përfundoi Shkëmbi.

Pas kësaj fitore, Ballkani ia ka marrë Dritës vendin e parë me 44 pikë, aq sa kanë edhe gjilanasit që tani kanë zbritur në pozitën e dytë./Gazeta inFokus/