Rozë

Apel për ndihmë për artisten Rinesa Qeriqin e cila u diagnostikua me sëmundje të rëndë

Autori: Gazeta inFokus 16:10 | 07 May 2025

Këngëtarja shqiptare që jeton jashtë vendit, Rinesa – e njohur për publikun me emrin artistik Rinesance – ka ndarë me ndjekësit e saj një prej rrëfimeve më të vështira dhe prekëse të jetës.

Përmes një postimi emocional në Instagram, ajo ka treguar se është diagnostikuar me tumor në tru.

Për ta ndihmuar në këtë sfidë të madhe shëndetësore, është hapur një faqe GoFundMe, përmes secilës është bërë një thirrje për mbështetjet financiare.

-Advertisement-

Në njoftim thuhej se kjo diagnozë e rëndë erdhi ndërsa Rinesa ishte duke ndjekur ëndrrat e veta – karrierën e saj muzikore, studimet për Art dhe Dizajn, në Kolegjin George Brown, në Toronto dhe po ashtu duke punuar me gjysmë orari për të mbuluar shpenzimet e veta.

Siç potencohet ajo tanimë është detyruar t’i ndërpresë studimet dhe karrierën e saj për t’u përqendruar plotësisht te shërimi.

“Familja e saj, prindërit dhe motra e saj e përkushtuar, janë pranë saj në çdo hap, duke u kujdesur për të 24 orë në ditë. Ata kanë lënë anash jetën dhe punën e tyre, duke u përballur me një barrë të madhe financiare me faturat e ndërlidhura me mjekimin dhe shpenzimet e përditshme të cilat vazhdojnë e rriten. Andaj, ne ju drejtohemi me zemër të hapur dhe kërkojmë ndihmën tuaj”, thuhet në njoftimin e tyre.

“Çdo donacion – pa marrë parasysh shumën – apo edhe vetëm shpërndarja e kësaj fushate mund të bëjë një ndryshim të madh. Kjo do t’i mundësojë Rinesës dhe familjes së saj të përqendrohen tek ajo që është më e rëndësishmja në këto momente: shërimi i saj sa më i shpejtë”.

Lajmi për diagnozën e saj vjen vetëm pak kohë pas publikimit të këngës së saj më të re në bashkëpunim me reperin Buta, të titulluar “Dy telefona”.