Lajme

“Albini e ka pranu Asociacionin, vetëm është duke bërë kalkulim elektoral”

Autori: Gazeta inFokus 09:00 | 01 February 2023

Deputeti i PDK-së, Hajdar Beqa, deklaroi se kryeministri Albin Kurti e ka pranuar marrëveshjen e Asociacionit të Komunave me shumicë serbe, por sipas tij, vetëm është duke bërë kalkulim elektoral.

Sipas Beqës, kryeministri nuk po i përmbahet premtimeve që i ka thënë sa ishte në opozitë, e tani sipas tij, Kurti duhet të gjejë një rrugë.

I ftuar në emisionin” Info Nata”, deputeti i PDK-së, theksoi se marrëveshja e Asociacionit nuk është në shpërputhje me Kushtetutën e Kosovës, ashtu siç po pretendon Qeveria sepse sipas tij, këtë po e vërtetojnë edhe deklarimet e ndërkombëtarëve në këtë rast ShBA-ja dhe BE-ja.

-Advertisement-

“Unë mendoj që këtë rast marrëveshja si Asociacioni duhet të jetë në frymë të plotë me Kushtetutën e Republikës së Kosovës, nuk mund të themi që nuk është, thjeshtë edhe deklarimi i miqve ndërkombëtar është që të jetë në kuadër të Kushtetutë së Kosovës. Por ajo nuk hyn në fuqi pa e marrë një veprim në këtë rast Qeveria e Kosovës dhe ekzekutivi nuk duhet të votojë një statut i cili është në kundërshtim me Kushetutën. Dhe ne inkurajojmë që të bëjë një veprim në harmoni me Kushtetutën”, tha Beqa.

Madje ai tha se kauzat e kryeministrit Kurti sa i përket kundërshtimit të Asociacionit janë falco, kjo sepse siç tha ai, po të donte kryeministri ta rrëzonte këtë marrëveshje ai do ta sjellte në Kuvend që të votohej. Por Beqa tha se Kurti nuk po e bën këtë sepse tashmë ai e ka pranuar këtë marrëveshje.“Albin Kurti, unë mendoj që i ka kauza falco të tij, sepse unë mund të them nëse ky me të vërtetë kish dashtë më e rrëzu këtë marrëveshje e kish pru në Parlament, i ka 51 për qind edhe unë e kisha votu personalisht ta rrëzoj këtë marrëveshje. Por ai nuk e ka seriozisht, unë mendoj që ai e ka pranu Asociacionin vetëm është duke e bërë një kalkulim, është mendim i imi. Mendoj që e ka pranu Asociacionin por është tu bë kalkulim në periudhën kohore, a me shku në Asociacion para zgjedhjeve, a me shku në zgjedhje është duke bërë kalkulim elektoral”, tha tutje Beqa.

Subscribe në YouTube: GAZETA INFOKUSI