“Përshëndetje për ju, por megjithatë përshëndetje edhe për të akuzuarit se vijnë nga vendi im dhe kanë lënë pozita udhëheqëse atje, por pyetja nuk ka pas të bëjë me këtë, por ju ma kujtuat që duhet t’i përshëndes. Unë e kam një shqetësim për rrugëtimin tim dhe njerëzve si unë që vijnë me dëshmu në këtë gjykatë”, tha dëshmitari.

Pas kësaj, seanca kaloi në sesion privat me urdhër të kryetarit të trupit gjykues, Charles Smith III, i cili para se ta marrë fjalën dëshmitari, ia kujtoi atij që nuk duhet t’iu drejtohet të akuzuarve dhe nuk duhet t’i përshëndes, gjë të cilën e bëri, raporton “Betimi për Drejtësi“.

Gjatë dëshmisë së ish-anëtarit të UÇK-së, përveç palëve të tjera, ai u mor në pyetje edhe nga trupi gjykues. Gjyqtari Chrisptoh Barthe e pyeti lidhur me arsyen e arrestimit të Fetah Rudit.

Rrahmanaj pohoi se ka thënë që një prej arsyeve ishte për shkak të disa ndihmave humanitare.

“Disave të tjerë për të cilët nuk kam emër për ta thanë, a unë u bazova vetëm në deklaratën që ma ka thanë zoti Rudi, për pjesën ai që thotë. Këtë e kam të dëgjuar, por jo prej dikuj me emër të veçantë”, tha dëshmitari.

Ndërsa, në pyetjet e gjyqtarit Guénaël Mettraux, dëshmitari pohoi se Haxhi Shala dhe Fatmir Limaj janë nda i njëjti fshat. Por, nuk u dëgjua përgjigja e tij kur u pyet se a e dinte që ata janë nip e dajë.

“Nuk jam i saktë 100 % se nuk kam najfarë kontakti të afërt me ata”, tha dëshmitari tutje.

Rrahmanaj po ashtu u pyet se çfarë hapi do të merrte në rast se shihte ndonjë ushtar që keqtrajtonte ndonjë civil.

“Do ta këshillonim që të mos përsëritet një gjë e tillë dhe të mos përdorej dhuna ndaj askujt”, u përgjigj ai.

E nëse këshilla e tij nuk do të merrej parasysh, Rrahmanaj tha se do të kontaktonin familjen e ushtarit që të mos ndodhte një gjë e tillë. Megjithatë, dëshmitari tha se nuk kanë pasur raste të tilla.

Kurse, gjyqtari Fergal Gaynor fokusoi pyetjet tek marrja e zyrave të LDK-së në Malishevë nga anëtarët e UÇK-së.

Në anën tjetër, duke u përgjigjur në pyetjet e avokates së Krasniqit, Venkateswari Alagendra, dëshmitari tha se Krasniqin e kishte parë për herë të parë në Malishevë.

“Hera e parë që e shihsha nga afër përveç asaj fotografisë nga televizioni”, tha ai, duke shtuar se kjo gjë kishte ndodhur pas një takimi që po mbahej atje.

Ndryshe, për ZPS-në dëshmitari kishte thënë se Jakup Krasniqi kishte akuzuar Cen Deskun dhe Jakup Kastratin në gjykimin ndaj Fatmir Limajt, si kolaboracionistë dhe për këtë arsye nuk e kishte ftuar atë në shtëpinë e tij.

Dëshmitari Rrahmanaj theksoi se këto ia kishte thënë Jakup Kastrati sepse vetë ai nuk e kishte përcjellë gjykimin.

Ndërsa, avkokatja Alagendra i tha dëshmitarit se Jakup Krasniqi kishte thënë në gjykimin e Limajt se nuk beson që atëherë i akuzuari kishte dorë në vrasjen e Ramiz Hoxhës dhe Selman Binishit pasi njërin e kishte bashkëfshatar dhe tjetri ishte nga fshati ngjitur.

Avokatja tha se klienti i saj kishte deklaruar se që nga dalja publike ata nuk kanë vendosur maska dhe se maskat në atë kohë ishin në kundërshtim me UÇK-në.

Më pas, dëshmitarit iu prezantua një komunikatë e datës 25 qershor 1998, për të cilën për ZPS-në ky dëshmitar kishte thënë se nuk i kujtohet.

Gjithashtu, për ZPS-në ai kishte thënë se kishe pasaktësi në këto komunikata, se ishin të paplota dhe nuk raportonin me saktësi sukseset.

“Kështu mendoj unë”, tha Rrahmanaj, kur u pyet se a është e vërtetë se kishte pasaktësi në komunikata.

Dëshmitarin e mori në pyetje edhe avokati i Kadri Veselit, Rodney Dixon, ndërsa mbrojtja e Rexhep Selimit nuk pati pyetje.

Pas përfundimit të pyetjeve të mbrojtjes, pyetje sqaruese kishte sërish prokurori Matt Halling.

Ndryshe, nesër pritet që të mbahet vetëm seanca për ecurinë e çështjes gjyqësore në këtë rast, duke filluar nga ora 14:30.

Mbrojtja e Rexhep Selimit kërkoi që klienti i tij ta ndjekë seancën e nesërme përmes njësisë së paraburgimit nga video-lidhja.

Sipas gjyqtarit Smith, kjo gjë mund të mundësohet, por kërkoi që të bëhet kërkesa përkatëse me shkrim.