Në kuadër të ciklit debatues e diskutues “LDK ju dëgjon”, kryetari i LDK-së, Lumir Abdixhiku me bashkëpunëtorë ka qëndruar në Malishevë.

Gjatë takimit me qytetarë dhe struktura Abdixhiku ka folur ndër të tjerash për dy skandalet e fundit atë të Oliver Ivanovic, krimineli i luftës i dënuar me 9 vite burgim i lartnuar si kontributdhënës për qytetin dhe skandalin me Martin Berishajn që kryeministri i është bërë mburojë. Skandalet e njëpasnjëshme që kanë vërshuar këtë Qeveri e këtë mentalitet qeverisës tashmë janë bërë të zakonshme.

“Ambasadori i Kosovës në Kroaci, Martin Berishaj përveçse nuk e deklaroi pronësinë e tij mbi tri kompani private, në deklarimin e obligueshëm të pasurisë së tij, ai ka shkuar përtej edhe ka fshehur pasurinë e tij. Pra një ambasador i Kosovës në Kroaci me dy kallëzime penale, vazhdon të marrë mbështetje të parezervë prej pushtetit, përkundër fakteve tashmë të qarta nga media vendore e ndërkombëtare. Sipas raportimeve tashmë të bëra publike, janë tërhequr nga ai në mes të Prishtinës, 1.4 milionë euro para të gatshme kesh. Paratë janë transferuar nga kompania energjetike ‘GEN-I’ me seli në Beograd. Ballina me lajme skandaloze në rajon për të njëjtin rast por heshtje totale e kryeministrit tonë. A është ligji i njëjtë si për të gjithë qytetarët tanë, i njëjtë për familjarë, miq e bashkëpunëtorë?”, ka thënë Abdixhiku.

Ai ka folur edhe për deklarimin e kryeministrit të Kosovës dhe lartnimin e figurës së Oliver Ivanovic i dënuar për krime lufte.

“Glorifikimi i një krimineli lufte, i dënuar me 9 vite burgim për vrasjen e 31 civilëve shqiptarë. I njëjti nga pushteti aktual na portretizohet si person që ka kontribuar për një Kosovë shumë etnike, pra njeriun që pushteti e cilëson si kontribues të qytetit të tij. Mjafton tu referohemi të dhënave të dëshmitarëve të familjarëve të vrarë e të shohim qartë se çfarë krimineli lufte, kryeministri ynë po na e paraqet si promovues të paqes dhe harmonisë ndëretnike. Kërkim falja është më e pakta që mund të ia bëjmë popullit tonë”, ka thënë Abdixhiku.

Po ashtu Abdixhiku ka theksuar faktin që ky nuk është ndryshimi që Kosova ka pasur nevojë; kjo nuk është Kosova që gjenerata të tëra kanë sakrifikuar për të.

Nga Malisheva kryetari Abdixhiku u bëri thirrje qytetarëve dhe anëtarëve të LDK-së për mobilizim dhe të japin kontributin e tyre në hartimin e platformës tonë politike. Cikli debatues “LDK ju dëgjon” po vazhdon në secilin qytet të Kosovës dhe padyshim që zëri qytetarë, problemet dhe sfidat e tyre do të adresohen në planin qeverisës së LDK-së.

Çka do të thotë të gatuash shqip?

Sponsoruar