Këtë të martë ministrja e Ekonomisë, Artane Rizvanolli, ka marrë vendim për ndalimin e prodhimit të kriptovalutave në Kosovë, shkruan Gazeta Infokus.

Por si mund të bëhet kjo kur veprimtaria e prodhimit të kriptovalutave në Kosovë është krejtësisht ilegale e madje nuk dihet as se ku e si prodhohen ato.

Në një përgjigje për Gazetën Infokus, nga Ministria e Ekonomisë kanë thënë se identifikimi i lokacioneve se ku është duke u zhvilluar kjo veprimtari dhe ndalimi i tyre do të bëhet nga organet e rendit dhe drejtësisë.

-Advertisement-

“Identifikimi i lokacioneve të prodhimit si dhe ndërprerja e këtyre aktiviteteve do të bëhet nga ana e organeve të rendit dhe të drejtësisë në bashkëpunim të ngushtë me institucionet relevante të sektorit të energjisë”, thuhet në përgjigjen e Ministrisë së Ekonomisë.

E ndalimin e kësaj veprimtarie nga ky dikaster nuk e shohin si shumë shqetësues për disa arsye.

“Kjo veprimtari nuk shpie tek punësimi i fuqisë punëtore, si dhe prodhuesit e kriptovalutave nuk paguajnë taksa për këtë aktivitet në Republikën e Kosovës, pasi kjo veprimtari nuk është e rregulluar me ligj”, kanë thënë nga Misnitria e Ekonomisë.

Lidhur me vendimin për ndalimin e kësaj veprimtarie nga kjo ministri thonë se është marrë për shkak se prodhimi i kriptovalutave shpenzon sasi të konsiderueshme të energjisë elektrike dhe një gjë e tillë e rëndon edhe më shumë situatën me krizën energjetike në vend.

Por për një gjë janë të sigurtë në ministrinë e drejtuar nga Artane Rizvanolli.

“Një ndër faktorët e rritjes së konsumit besohet të jetë prodhimi i kriptovalutave në vend, me theks të veçantë në veri të vendit, ku për shkak të mospagesës të energjisë elektrike, prodhimi i kriptovalutave konsiderohet të jetë më i larti në vend”, kanë thënë ministria.

Gjithashtu, nga Ministria e Ekonomisë thonë se prodhimi i një kriptovaluteje konsumon energji sa afro 19 shtëpi Kosovare mesatare në vit pa marrë parasysh faktorët e pajisjeve të specializuara të cilat përpunojnë të dhënat më shpejtë dhe rrjedhimisht konsumojnë më shumë energji.

“Prodhimi i një kriptovaluteje duke marrë parasysh shifra konzervative konsumon energji sa afro 19 shtëpi Kosovare mesatare në vit”, thuhet në përgjigjen e dhënë për Gazetën Infokus./Gazeta Infokus/

Udhëto nga Suedia drejt Kosovës me PrishtinaTickets

Sponsoruar

-Advertisement-