Lajme

Në kalanë e Vushtrrisë kthehet lufta për restorant

Autori: Gazeta inFokus 18:38 | 17 October 2019

Restoranti i dajës së ish-kryetarit të Vushtrrisë, Bajram Mulaku, ka gjasë të hapët së shpejti në Kalanë e Vushtrrisë. Dy vite më parë një nismë e tillë ishte ndërprerë pas kundërshtimit të qytetarëve dhe shoqërisë civile në këtë komunë, të cilët i dolën në mbrojtje Kalasë së qytetit.

Por, këtë të mërkurë Instituti për Mbrojtjen e Monumenteve brenda një dite, pa pyetur askënd në Komunën e Vushtrrisë, ka vendosur ta rihap këtë çështje dhe t’ia japë përsëri në shfrytëzim një pjesë të kalasë, kompanisë “Dardania Castle” me pronarë Mentor Salihu.

Kundër këtij vendimi ka dalë i pari i Vushtrrisë, Xhafer Tahiri, duke e quajtur skandaloz vendimin e Institutit të Kosovës për Mbrojtjen e Monumenteve.

-Advertisement-

“Instituti i Kosovës për Mbrojtjen e Monumenteve, në një procedurë super të shpejtë, brenda 1 dite të vetme, pa e njoftuar fare Komunën e Vushtrrisë, në kundërshtim me qëndrimet e Kuvendit të Komunës, ka nxjerrë vendim të kundërligjshëm për dhënien në shfrytëzim të Kalasë së Qytetit për gastronomi???”, ka shkruar Tahiri në llogarinë e tij në Facebook.

Ai është zotuar se nuk do të lejojnë që ky objekt të kthehet në biznes.

“Kalaja është trashëgimi kulturore e qytetit të Vushtrrisë dhe nuk do të lejojmë që të bëhet restorant!”, ka thënë i pari i Vushtrrisë.

Në krah të kryetarit, kanë dalë edhe shoqëria civile.

Njëra nga organizatorët e nismës “Mos ma prek Kalanë!”, Leonora Aliu ka thënë se ky është vendim i turpshëm dhe në kundërshtim me vullnetin e qytetarëve të Vushtrrisë, shkruan gazeta inFokus.

“Përkundër reagimeve e protestës qytetare herën e fundit kur pati një tentim të tillë nga daja i kryetarit të atëhershëm të komunës, Bajram Mulaku. Prokuroria e shtetit pati nis hetim asokohe madje. Në emër të qytetarëve dhe organizatorëve të protestës “Mos ma prek Kalanë!”, bëjë thirrje për veprim të institucioneve të ligjit për mbrojtjen e monumentit tonë të trashëgimisë kulturore”, ka shkruar Aliu./Gazeta inFokus/