Fun & Video

Bllokohet një valixhe e ‘tmerrshme’ në aeroport

Autori: Gazeta inFokus 21:08 | 26 January 2019

Qeni beagle po patrullonte në Aeroportin Ndërkombëtar Pearson të Torontos për mallra kontrabandë, kur një aromë e pazakontë i ngacmoi nuhatjen. Burimi ishte valixhja e një kanadezi, i cili sapo ishte kthyer nga Rusia.

Zyrtarët menjëherë hapën çantën e tij dhe brenda gjetën me qindra kontenierë të mbushur me shushunja të gjalla dhe jo pak, por plot 5 mijë të tilla. Ishte 17 Tetori i 2018-s dhe beagle-i besnik sapo kishte ndihmuar autoritetet për të kapur “trafikantin” e parë të shushunjave në Kanada.

Ky incident u bë publik për herë të parë në një artikull të National Geographic, të botuar këtë të premte.

-Advertisement-

Personi në fjalë, identiteti i të cilit nuk është bërë publik për shkak se hetimet vijojnë, akuzohet për import të jashtëligjshëm të një specieje, pa pasur lejen përkatëse. Ai pritet që të dalë para një gjykate në Toronto, muajin e ardhshëm.

Shushunjat janë krimba parazitarë që gjenden në çdo kontinent përveç Antarktikës. Shumë prej tyre ushqehen me gjak (disa ushqehen vetëm 1 herë në vit), duke i bërë të bezdisshme për viktima e tyre, por nga ana tjetër janë tepër të dobishme në mjekësi.

Shushunjat e sekuestruara ishin dy lloje, shushunjat medicinale jugore dhe shushunjat medicinale europiane, që përdoren zakonisht në spitale, apo në qendra të kirurgjisë plastike nëpër botë. Shushunjat konsumojnë gjakun e tepërt dhe përmirësojnë qarkullimin në indet e dëmtuara. Ato mund të shiten për rreth 10 dollarë një.

Personi që transportonte valixhen me 5 mijë shushunja deklaroi se i kishte për përdorim personal dhe se ujin e ndotur prej tyre do ta përdorte për të rritur orkidetë e tij. Megjithatë sipas ekspertëve, një sasi kaq e madhe shushunjash sugjeron se ato ishin për përdorim tregtar.

Autoritetet dyshojnë se ai mund të ketë qenë në kërkim të blerësve që e përdorin shushunjën për të trajtuar ngrirjen dhe për të ndihmuar në rikuperimin nga lifting i fytyrës.

Disa njerëz i duan shushunjat për përdorim në shtëpi, duke besuar se ato mund të lehtësojnë dhimbjen, apo ta pastrojnë trupin nga gjaku “i keq”. Por pa antibiotikë të dhënë nga mjeku, përdorimi i tyre mund të jetë i rrezikshëm, pasi mbajnë me vete infeksione të mundshme./tvklan.al

Subscribe në YouTube: GAZETA INFOKUSI