Lajme

Shpella e Gadimes rihapet nesër

Autori: Gazeta inFokus 14:32 | 05 May 2018

Turistët që tash e sa ditë nuk patën mundësi të hynë brenda Shpellës së Gadimes, këtë mund ta bëjnë nga nesër.

Kështu së paku ka thënë për Infokusin, Ilir Morina, kryeshef i Agjencionit për Mbrojtjen e Mjedisit te Kosovës.

Morina ka thënë se tash e dy ditë Shpella e Gadimës është mbyllur për shkak të një problemi me energjinë elektrike.

-Advertisement-

‘Brenda shpellës ka pas një problem me energji elektrike ndërsa për mos rrezikim të vizitorëve kemi vendosur që të mbyllet shpella deri në përmirësimin e defektit’, ka thënë ai.

Rojet e kanë demantuar Morinën duke thënë se Shpella ka një javë që po qëndron e mbyllur.

Madje njëri nga rojet ka bërë të ditur se tash e një javë e kanë informuar ministrinë e mjedisit për telashet por askush nga ta nuk është parë të ketë shkuar për të intervenuar për riparimin e prishjeve elektrike.

Kryeshefi i Agjencionit për Mbrojtjen e Mjedisit te Kosovës ka thënë gjithashtu se kompania e kontraktuar do të filloj punimet sot ndërsa nga nesër Shpella do të rihapet për vizitorët.
‘Kompania e cila ka fituar tenderin për rregullimin e problemit energjetik fillon punën sot dhe nesër pritet që shpella të hapet për vizitorë’, ka thënë ai.

Të shtunën Infokusi ka raportuar për mbyllje të Shpellës së Gadimes ndërsa vetëm deri në orët e mesditës pa pasur mundësi të vizitojë shpellën, mbrapshtë janë kthyer dhjetëra qytetarë polakë dhe dy autobusë me nxënës nga Presheva.

E rojet e shpellës kanë bërë të ditur se situatë e ngjashme po paraqitet çdo ditë, mesatarisht nga dhjetë autobusë e dhjetëra vetura kthehen mbrapa të zhgënjyer duke mos pasur mundësi të vizitojnë Shpellën e Gadimes.

Në shkurt të 2015-ës në Shpellën e Gadimes ishte realizuar një investim në ndriçimin e brendshëm me vlerë prej 11 mijë eurosh të financuar nga ambasada franceze/INFOKUSI

Subscribe në YouTube: GAZETA INFOKUSI