Anëtari i Lëvizjes Vetëvendosje, Boiken Abazi ka reaguar në lidhje me ngritjen në këmbë që bëri ish-kryetari i VV-së,Visar Ymeri në seancën solemne gjatë intonimit të himnit të Kosovës.

Abazi përmes një postimi në llogarinë e tij në Facebook, Abazi ka thënë se me këtë veprim Ymeri e ka tradhtuar vetën, bindjet e veta dhe angazhimin e tij disa vjeçar për këtë temë. Sipas tij, prej Ymerit mund të priten tash edhe “çudira” të tjera

“Tash që ka dhënë dorëheqje nga shumica e funksioneve në Lëvizje, Visar Ymeri duket se edhe e njeh edhe po e respekton këtë flamur e himn që vetë i ka kritikuar ashpër dhe nuk i ka respektuar më herët. Pra, para së gjithash, me ngritjen në këmbë që ka bërë dje në Kuvendin e Kosovës, Visar Ymeri ka tradhëtuar veten, bindjet e veta dhe angazhimin e tij disa vjeçar për këtë temë, dhe prandaj prej tij mund të priten tash edhe “çudira” të tjera, m.q.s nuk ka dhënë asnjë shpjegim publik për këtë çështje, për të cilën nuk mund të fshihet pëmes statuseve në FB të atyre pak individëve që e ndjekin, duke bërë me gisht nga anëtarë të tjerë të Lëvizjes, thjeshtë për të mbuluar tradhëtinë që së pari e ka bërë ndaj bindjeve të veta politike”, ka shkruar Abazi.

Visar Ymeri së bashku me anëtarët e tjerë të cilët kanë dhënë dorëheqje nga Lëvizja Vetëvendosje janë çuar në këmbë gjatë intonimit të himnit të Kosovës, veprim ky që dikur Visar Ymeri nuk e bënte.

Ky është postimi i plotë:

Lëvizja VETËVENDOSJE! nuk ka detyruar kurrë askënd, asnjë aktivist, të mos çohet ose të çohet në këmbë para flamurit dhe gjatë intonimit të himnit të Kosovës. Lëvizja VETËVENDOSJE! thjeshtë ka qenë koherente në analizën e saj për mënyrën se si u vendos për simbolet e shtetit të Kosovës. Mos të harrojmë që dizajni për flamurin e Kosovës është përcaktuar me tender, ku kusht ishte mos të kishte ngjyrë të kuqe, të zezë, ose ndonjë simbol që i ngjan shqiponjës, dhe ku edhe vendi i dytë në këtë konkurs me tender fitoi çmim. Asnjë shtet tjetër i botës nuk ka vepruar në këtë mënyrë, që në pamje të parë duket absurde, por në një analizë të dytë kuptohet se është reflektim i sistemit shtypës neokolonial që sundon në Kosovë si imponim kundër vullnetit të përgjithshëm popullor – qytetarëve të Kosovës i ndalohet e drejta demokratike për ta hedhur në referendum këtë çështje, e shumë çështje të tjera jetike për vendin.

Problemi me ngritjen në këmbë që bëri dje Visar Ymeri gjatë intonimit të himnit të Kosovës nuk lidhet me atë se kush tjetër është çuar e kush tjetër nuk është çuar në këmbë dje apo më herët, por së pari me faktin e pamohueshëm që shumë pak kohë më parë i njëjti, Visar Ymeri, e ka shpjeguar publikisht se e njeh flamurin dhe himnin (pa tekst) të Kosovës, por nuk i respekton ato për shkak të simbolikës antidemokratike dhe neokoloniale që ato përfaqësojnë, dhe prandaj nuk është çuar në këmbë kur ky himn është intonuar më herët. Tash që ka dhënë dorëheqje nga shumica e funksioneve në Lëvizje, Visar Ymeri duket se edhe e njeh edhe po e respekton këtë flamur e himn që vetë i ka kritikuar ashpër dhe nuk i ka respektuar më herët. Pra, para së gjithash, me ngritjen në këmbë që ka bërë dje në Kuvendin e Kosovës, Visar Ymeri ka tradhëtuar veten, bindjet e veta dhe angazhimin e tij disa vjeçar për këtë temë, dhe prandaj prej tij mund të priten tash edhe “çudira” të tjera, m.q.s nuk ka dhënë asnjë shpjegim publik për këtë çështje, për të cilën nuk mund të fshihet pëmes statuseve në FB të atyre pak individëve që e ndjekin, duke bërë me gisht nga anëtarë të tjerë të Lëvizjes, thjeshtë për të mbuluar tradhëtinë që së pari e ka bërë ndaj bindjeve të veta politike.

KosovaMed përmbyll vitin me sukses – dhuron donacione për QKMF-në e Junikut

Sponsoruar