Lajme

Serbia dhe Mali i Zi më pranë anëtarësimit në BE

Autori: Gazeta inFokus 10:44 | 21 January 2018

Serbia dhe Mali i Zi ka të ngjarë të hyjnë më parë se të vendet e tjara në Bashkimin Evropian, ndoshta para vitit 2025, thotë Johannes Hahn, komisioneri i BE-së për anëtarësimin në një intervistë për agjencinë Reuters. Bashkimi Evropian po nis një përpjekje diplomatike që synon përshpejtimin e hapave për anëtarësimin e gjashtë vendeve të Ballkanit Perëndimor në BE pas disa viteve gjatë të cilave janë shënuar hapa përpara por edhe prapa.

Shqipëria, Bosnja, Kosova, Maqedonia, Mali i Zi dhe Serbia shpresojnë të hyjnë në Bashkimin Evropian, por shanset e anëtarësimit të tyre vitet e fundit janë zbehur, pasi politikanët e BE-së duket se po humbasin interesin. Arsyeja? Euroskeptizmi në rritje, kriza e eurozonës në vitet 2009-2013 dhe vota e Britanisë për t’u larguar nga blloku.

Megjithatë, rritja e ndikimit rus, kriza e emigracionit, rrëshqitja e Turqisë drejt autoritarizmit dhe synimi për të forcuar integrimin evropian pas largimit të Britanisë në vitin 2019, paraqesin një shans të ri për Ballkanin.

-Advertisement-

“Ose ne si Bashkim Evropian do të eksportojmë stabilitet ose do të importojmë paqëndrueshmëri”, tha komisioneri Hahn, duke argumentuar se procesi i pranimit në BE është mënyra më e mirë për të luftuar korrupsionin, krimin e organizuar dhe kërcënimin e autoritarizmit.

Pengesat për përmbushjen e kushteve të anëtarësimit janë megjithatë të shumta.

Sistemet bankare dhe gjyqësore në të gjashtë vendet e Ballkanit janë të dobëta dhe të ardhurat në rajon janë sa 30 përqind e atyre në eurozonë, sipas Fondit Monetar Ndërkombëtar.

Rajoni ende bart plagët e konflikteve etnike që pasuan shpërbërjen e ish-Jugosllavisë në vitet 1990.

Bosnja mbetet thellësisht e ndarë. Serbia nuk e njeh pavarësinë e Kosovës dhe e akuzon atë se po kërkon luftë me Beogradin. Mali i Zi mbeti i zhytur në krizë politike në pjesën më të madhe të vitit 2017.

Strategjia e BE-së mbështetet tek ideja që Serbia dhe Kosova të arrijnë një “normalizim të marrëdhënieve” deri në fund të vitit 2019, sipas një projektplani të BE-së për Ballkanin, të raportuar nga agjencia Reuters.

Por zoti Hahn pranon se vrasja e udhëheqësit serb të Kosovës Oliver Ivanoviç flet për vazhdimin e paqëndrueshmërisë në rajon.

Subscribe në YouTube: GAZETA INFOKUSI
Etiketa:
Diplomon gjenerata e dytë e studentëve UNIK të UNI-të me diploma të fuqizuara nga Arizona State University
-Advertisement-

Të tjera

Fokusi

lajme