Sport

Trajneri i Skënderbeut kërkon fitore në Beograd kundër Partizanit

Autori: Gazeta inFokus 17:13 | 27 October 2017

‘Skënderbeu hyn në çdo takim për fitore’, ka deklaruar trajneri i ‘Ujqërve të dëborës’ në prag të ndeshjes në shtëpi kundër Luftëtarit, por kur vëmendja është e gjitha për ndeshjen e së enjtes së ardhshme kundër Partizanit të Beogradit në Serbi.

Pas barazimit pa gola në “Elbasan Arena” kundër Partizanit të Beogradit, Ilir Daja nuk e sheh të pamundur një fitore në Serbi të enjten e 2 nëntorit, atje ku disa vite më parë lojtarët e Kombëtares u dhunuan në fushë.

“Skënderbeu hyn në çdo takim për fitore, por prezent janë të tre rezultatet. Kemi treguar kur hyjmë me dëshirë maksimale dhe ritëm e kemi të thjeshtë të shkojmë tek fitorja”, ka deklaruar Daja.

-Advertisement-

Por Ilir Daja shprehet se ka hasur vështirësi pasi nuk ka pasur të gjithë grupin në dispozicion për të bërë një rrotacion të plotë në kampionat dhe në Europa League, por thekson se janë mësuar me intensitetin e lartë të ndeshjeve, raporton TCH.

“Jemi mësuar me këtë intesitet dhe ndeshjet njëherë në katër dite. Problem është që nuk kemi pasur gjithë grupin në dispozicion. Rotacioni i pamundur. E rëndësishme është që ne vazhdim do të ketë rikthime”, vlerësoi ai.