40 gjykatës dhe 13 prokurorë serbë janë dekretuar e betuar gjatë ditës së djeshme para presidentit të Kosovës, Hashim Thaçi, me ç’rast është zbatuar edhe hapi i parë drejt fillimit të zbatimit të Marrëveshjes për Drejtësi ndërmjet Kosovës e Serbisë, të nënshkruar në shkurtin e vitit 2015, shkruan sot, gazeta Zeri.

Kjo Marrëveshje dështoi të bëhet javën e kaluar sepse gjykatësit serbë dhe prokurorët nuk u shfaqën fare, gjë e cila ndodhi për shkak se Beogradi kërkoi shtyrjen e saj.
Lidhur me dekretimin e tyre mediet patën mundësinë të informohen vetëm përmes komunikatës së Zyrës së Presidentit, pasi që kjo ngjarje nuk ishte e hapur për mediet. E këtë gjë analistët e vendit e shohin si gjë të pritur pasi, sipas tyre, as vetë negociatat mes Serbisë dhe Kosovës nuk janë transparente.

Ata zbatimin e Marrëveshjes për Drejtësi mes dy shteteve e shohin me dyshim pasi që, sipas tyre, Serbia vazhdimisht do të tentojë ta tregojë fuqinë e saj në shtetin e Kosovës.
Thaçi: Kosova, vend i barazisë së plotë

-Advertisement-

Presidenti Hashim Thaçi, pas dekretimit të gjyqtarëve e prokurorëve serbë, ka thënë se Kosova është vend i barazisë së plotë dhe sipas tij, kjo gjë është pikërisht produkt i kësaj barazie.

“Kosova është ndërtuar mbi parimet kushtetuese të gjithëpërfshirjes, të barazisë dhe të lirisë së secilit individ. Kosova ka miratuar masa adekuate për ta promovuar një barazi të plotë dhe efektive ndërmjet pjesëtarëve të komuniteteve në të gjitha fushat e jetës ekonomike, shoqërore, politike dhe kulturore”, ka theksuar presidenti. Ai ka thënë se dekretimi i gjyqtarëve dhe prokurorëve nga komunitetet joshumicë pasqyron plotësisht natyrën shumetnike të Kosovës.

Sipas tij, Kosova në vazhdimësi ka bërë dhe po bën reforma në sistemin gjyqësor dhe atë prokurorial me të vetmin qëllim që sistemi gjyqësor dhe ai prokurorial të funksionojë sa më mirë.

“Në këtë rrugëtim kemi pasur mbështetje edhe nga miqtë tanë ndërkombëtarë, të cilët i falënderojmë. Gjyqtarët dhe prokurorët kanë rol të madh në jetën e qytetarëve, në realizimin e të drejtave të tyre dhe në sigurinë e qasjes së barabartë në drejtësi pa marrë parasysh dallimin e tyre gjinor, racor, fetar e kombëtar”, ka shtuar presidenti.

Ai duke iu drejtuar gjykatësve u ka thënë atyre se mbi supet e tyre është një përgjegjësi e madhe.

“Mirëpres gatishmërinë tuaj për t’u integruar në gjyqësorin e Kosovës dhe për të punuar në përputhje me legjislacionin e Kosovës. Po ashtu mirëpres gatishmërinë e juaj se funksionin e gjyqtarit, respektivisht të prokurorit, do ta ushtroni me nder, përgjegjësi dhe paanshmëri, duke respektuar rregullat e etikës profesionale”, ka thënë presidenti Thaçi.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-