Sport

F1, Vettel e Raikkonen sërish te Ferrari edhe në 2018-n

Autori: Gazeta inFokus 13:19 | 31 July 2017

Sebastian Vettel dhe Kimi Raikkonen duket se do të vazhdojnë të jenë shokë skuadre te Ferrari edhe për vitin 2018, pavarësisht zërave të fundit që flisnin për mundësinë e largimit të një prej tyre.

Është “Sky Italia” që e ka bërë të ditur këtë lajm, duke theksuar se zyrtarizimi i tyre do të bëhet në fillimin e muajit shtator, kur do të zhvillohet edhe Çmimi i Madh i Italisë, në Monza.

Ditët e fundit u fol shumë për ofertën e Ferrarit për Sebastian Vettel, që ishte një kontratë e re 3-vjeçare me pagë prej 120 milionë eurosh, me synimin që Vettel të mos tundohej nga ideja e kalimit te Mercedesi, ndërkohë që u fol me më shumë siguri për largimin e Kimi Raikkonen nga “kokëkuqja” italiane.

-Advertisement-

Por, sipas “Sky Italia”, finlandezi edhe këtë radhë e siguroi qëndrimin e tij te skuadra nga Maranello për të shënuar sezonin e tij të katërt radhazi aty.

Konfirmimi i mundshëm i dyshes Vettel-Raikkonen i mbyll dyert Alonsos, për të cilin ishin ngritur hipotezat për një rikthim te skuadra e Ferrarit. E njëjta gjë mund të thuhet edhe për kandidatë si Sergio Perez, Antonio Giovinazzi, apo Charles Leclerc.

Por, për këta dy të fundit, mundësitë për të qenë pjesë e Ferrarit nuk janë shuar aspak, pasi drejtuesit e “kokëkuqes” italiane kanë deklaruar se do të shohin nga të rinjtë në të ardhmen.

Subscribe në YouTube: GAZETA INFOKUSI