Lajme

Ndahen çmimet e videove më të mira për të mos u votuar të korruptuarit

Autori: Gazeta inFokus 08:12 | 08 Qershor 2017

Koalicioni i Organizatave për vëzhgimin e zgjedhjeve “Demokracia në Veprim” organizon ceremoninë e ndarjes së pesë çmimeve në kuadër të garës për videon më të mirë, pjesë e fushatës #AsUne nuk do të votoj për kandidatët e korruptuar.

Shefja e Zyrës së BE-së në Kosovë, Nataliya Apostolova do të ndajë çmimin e videos më të mirë të përgatitur nga të rinjtë në kuadër të fushatës së vetëdijësimit publik #AsUne.

Fushata u bën thirrje qytetarëve të Kosovës të mos votojnë për kandidatët e përfshirë në aktivitete të korrupsionit.

-Advertisement-

Rrjeti i organizatave të shoqërisë civile “Demokracia në Veprim” e udhëhequr nga Instituti Demokratik i Kosovës, i mbështetur nga Zyra e BE-së në Kosovë, më 1 qershor 2017 lansoi fushatën për vetëdijësimin publik e cila do të zgjasë edhe gjatë fushatës së zgjedhjeve lokale.

Fushata gjithëpërfshirëse në Kosovë që synon vetëdijësimin e qytetarëve dhe edukimin e votuesve do të fokusohet në zgjedhjet parlamentare dhe komunale.

Të gjitha aktivitetet janë paraparë nën temën \”Votimi i bashkuar kundër kandidatëve të korruptuar\” me simbolin #AsUne.

Çmimet e tjera do të prezantohen nga Ambasadori i Shteteve të Bashkuara në Kosovë, Greg Delawie, alpinistja Arineta Mula dhe gazetarët Astrit Gashi dhe Imer Mushkolaj.