Deputetja e Lidhjes Demokratike të Kosovës, Janina Ymeri, ka ngritur shqetësime lidhur me dallimet në tarifat e energjisë elektrike ndërmjet konsumatorëve në komunat me shumicë shqiptare dhe atyre në katër komunat veriore të Kosovës, shkruan Gazeta Infokus.

Përmes një reagimi publik, Ymeri ka pretenduar se qytetarët në pjesën tjetër të Kosovës paguajnë deri në 22 për qind më shtrenjtë energjinë elektrike sesa konsumatorët në veri.

“Çdo herë që pretendohet rritja e radhës së tarifave të rrymës, lëshohen video se kemi tarifat më të lira. Fillimisht, le t’i tregojmë Kosovës sa dallon tarifa e rrymës për komunat me shumicë serbe në veriun e Kosovës në krahasim me ne si banorë në komunat me shumicë shqiptare”, ka deklaruar Ymeri.

-Advertisement-

Sipas të dhënave të publikuara nga ajo, për konsumin deri në 800 kWh, tarifa e lartë e energjisë elektrike në pjesën tjetër të Kosovës është 9.05 centë për kWh, ndërsa në veri 7.4 centë, që paraqet një dallim prej rreth 22.3 për qind.

Ndërkohë, për tarifën e ulët, qytetarët në pjesën tjetër të Kosovës paguajnë 3.88 centë për kWh, krahasuar me 3.17 centë në veri, apo rreth 22.4 për qind më shumë.

Ymeri ka theksuar se dallime ekzistojnë edhe për konsumatorët që tejkalojnë bllokun prej 800 kWh.

Sipas saj, tarifa e lartë për këtë kategori është 15.43 centë për kWh në pjesën tjetër të Kosovës, ndërsa në veri 13.73 centë. Kurse tarifa e ulët është 7.28 centë, krahasuar me 6.47 centë në veri.

“Të dy palët kemi një kryeministër, një shtet. Dallimi është se në Qeverinë VV, rritja e energjisë elektrike na është lënë kosovarëve si barrë, duke përfshirë edhe një pjesë të shpenzimeve për veriun e Kosovës”, ka deklaruar deputetja e LDK-së.

Ymeri ka sqaruar se krahasimi i saj bazohet në faturat e konsumatorëve familjarë pas qershorit 2025, duke iu referuar edhe të dhënave të publikuara në faqen e furnizuesit të energjisë elektrike në veri, Elektrosever.

Pretendimet e deputetes për dallimet tarifore dhe përfshirjen e shpenzimeve të veriut në barrën e konsumatorëve të tjerë kërkojnë verifikim të veçantë nga dokumentet zyrtare të tarifave dhe faturimit.

Düsseldorf–Prishtinë, dy fluturime në ditë – rezervoni me PrishtinaTickets

Sponsoruar

-Advertisement-