Lajme

Nagavci: Serbia vazhdon me pretendime territoriale, Radojiçiq mbetet i lirë

Autori: Gazeta inFokus 10:53 | 15 Tetor 2026

Shefja e Grupit Parlamentar të Vetëvendosjes, Arbërie Nagavci, ka kritikuar Serbinë për pretendimet territoriale ndaj Kosovës.

Gjithashtu, ajo ka kritikuar Beogradin zyrtar që po e lë të lirë dhe nuk po e dorëzon kryeterroristin Milan Radojçiq.

“Më 9 tetor, në Kragujevc, kryet terroristi Milan Radojiçiq u shfaq pranë djalit të Aleksandër Vuçiqit në tubimin e Partisë Progresive Serbe. Organizatori i sulmit terrorist të Banjskës, ku u vra heroi ynë, rreshteri Afrim Bunjaku, i sanksionuar ndërkombëtarisht për lidhje me krimin e organizuar dhe korrupsionin, dhe ndaj të cilit është lëshuar fletë-arrestin ndërkombëtar përmes Interpolit, vazhdon të jetë i lirë në Serbi”, ka thënë ajo në foltoren e Kuvendit të Kosovës.

-Advertisement-

Sipas saj, Radojiçiq është shfaqur pranë familjes së presidentit serb në një kohë kur në Serbi po zhvillohen protesta kundër korrupsionit dhe keqqeverisjes.

Gjithashtu, ajo ka kritikuar Serbinë për mosdorëzimin e Radojiçiqit te autoritetet e Kosovës dhe për moszbatimin e fletarrestimit ndërkombëtar.

“Çfarë shteti është ky në mes të Evropës? Shtet i papërgjegjshëm, i padenjë për çdo lloj marrëdhënie ndërkombëtare. Më 7 tetor, ndërkaq, në Rashkë, Ivica Daçiq deklaroi se flamuri serb do të valvitet mbi Prizren dhe se Kosova mund të jetë e pushtuar, por kurrë e pavarur. Ne nuk habitemi. Këto nuk janë vetëm deklarata elektorale, por vazhdimësi e pretendimeve territoriale nga të cilat Beogradi nuk ka hequr dorë. Edhe nderimet publike për Ratko Mladiqin, të dënuar për gjenocid, e dëshmojnë këtë trashëgimi politike”, ka thënë ajo.