Me 95 vota për, asnjë kundër dhe asnjë abstenim, Kuvendi i Kosovës ka miratuar projektligjin për ratifikimin e marrëveshjes ndërmjet Republikës së Kosovës dhe Agjencisë Franceze për Zhvillim, e cila parasheh një kredi prej 60 milionë eurosh për renovimin dhe zgjerimin e kampusit të studentëve të Universitetit të Prishtinës, në kuadër të përgatitjeve për lojërat mesdhetare “Prishtina 2030”.

Ministri në detyrë i Financave, Hekuran Murati, gjatë prezantimit të marrëveshjes në Kuvend, ka dhënë detaje për projektin dhe mënyrën se si do të përdoren mjetet financiare.

“Projekti synon të rinovojë dhe zgjerojë infrastrukturën e kampusit të studentëve të Universitetit të Prishtinës, pjesa te konviktet si dhe të rinovojë dhe ndërtojë objekte sportive në institucione të ndryshme arsimore përreth hapësirës së konvikteve. Projekti do të sjellë përfitime për studentët, duke mbështetur njëkohësisht organizimin e Lojërave Mesdhetare që do të mbahen në vitin 2030 në Prishtinë. Si rrjedhojë, pra gjatë zhvillimit të lojërave kampusi i studentëve do të shërbejë përkohësisht si fshati i atletëve ndërkaq objektet sportive të shkollave përreth do të përdoren si qendra stërvitore për atletët. Përtej Lojërave Mesdhetare, projekti është i disenjuar për të vendosur një trashëgimi të qëndrueshme për studentët e Universitetit të Prishtinës si dhe banorët e qytetit”, tha Murati.

-Advertisement-

Duke folur për strukturën financiare të marrëveshjes, Murati ka bërë të ditur se vlera e kredisë është 60 milionë euro, ndërsa ekziston mundësia për përfitimin edhe të një granti shtesë.

“Sa i përket strukturës së financimit, vlera e kredisë që pritet ta financojë këtë projekt është propozuar që të jetë 60 milionë euro, me mundësi të fitimit edhe të një granti shtesë investiv në vlerë prej 10 milionë eurove të tjera”, bëri të ditur Murati.

Këto mjete do të shërbejnë për përmirësimin e infrastrukturës së kampusit universitar dhe objekteve sportive përreth, të cilat gjatë lojërave mesdhetare “Prishtina 2030” do të kenë funksion të rëndësishëm në akomodimin dhe përgatitjen e sportistëve.

Pas përfundimit të Lojërave Mesdhetare, infrastruktura e rinovuar pritet të mbetet në shërbim të studentëve të Universitetit të Prishtinës dhe komunitetit.

Udhëto Oslo – Prishtinë çdo javë me PrishtinaTickets

Sponsoruar

-Advertisement-