Qytetarët po përballen me një rritje të vazhdueshme të çmimit të naftës në vend pas zhvillimeve të fundit në botë.

Çmimi i naftës në Kosovë ka shënuar rritje të ndjeshme duke arritur deri në 1 euro e 74 cent për litër, nga rreth 1.12 euro sa ishte më herët, duke rritur presionin mbi qytetarët dhe ekonominë.

Në një intervistë për Gazetën Infokus, deputetja e LDK-së, Janina Ymeri, ka paraqitur një sërë masash konkrete që mund të marrë sipas saj qeveria e Kosovës dhe që mund të ndikojnë drejtpërdrejt në uljen e barrës për qytetarët.

-Advertisement-

Ajo thekson se zgjidhja më efektive është subvencionimi i targetuar për sektorët jetikë si, transporti publik, bujqësia, KEK-u, bizneset prodhuese dhe përpunuese, shëndetësia dhe emergjencat.

“Akciza ka ndikim më të menjëhershëm sepse është vlerë fikse për litër, por propozimi im konkret është subvencionimi i targetuar. Nuk mund të trajtohet njëjtë transporti publik me shfrytëzimin e makinës për qejf. Shteti duhet të ndihmojë aty ku është jetike: te transporti publik, bujqësia, KEK-u, bizneset prodhuese, përpunuese. Gjithashtu të mos harrojmë sektor si emergjencat, shëndetësia publike. Kjo siguron që të mos rritet çmimi për kategori kyqe dhe kostoja e prodhimeve tona vendore”, ka thënë Ymeri.

Deputetja Ymeri ka kërkuar gjithashtu që shteti të ndërmarrë hapa strategjikë për menaxhimin e krizës dhe sigurinë energjetike.

“Shteti duhet të lëvizë përtej ‘çmimeve tavan’ që po shihet se s’janë zgjidhje, duke ndërmarrë këto hapa: Shqyrtimi i rezervave: Të krijohet një plan i mirëfilltë për rezervat shtetërore dhe private. Duhet ta dijmë si do t’ia bëjmë si shtet nëse mbetemi pa import për 2 javë”, ka thënë ajo për Infokus.

Ajo ka theksuar edhe nevojën për bashkëpunim me industrinë e naftës, duke treguar se tashmë ka iniciuar hapa konkretë:

“Dialog me sektorin: Të ulemi me shoqatën e naftarëve për të parë perspektivën e tyre dhe kufizimet reale, në vend të vendimeve të njëanshme që nuk sjellin efekt afatgjatë. FYI une vet i kam ftuar ata edhe kane mbet me m tregu sot kohen e takimit.”

Sa i përket uljes së TVSH-së, deputetja e LDK-së shprehet qartë kundër përdorimit të saj si masë e menjëhershme, duke paralajmëruar për rreziqet.

“Ulja e TVSH-së nuk është domosdoshmërisht zgjidhje reale në këtë fazë. Situata jonë aktualisht ndryshon nga ajo e Maqedonisë së Veriut dhe TVSH-ja duhet të shihet si ‘plumbi i fundit’. Pa një plan efektiv, e as strategji, kur nuk ka as staf e taskforce per kontrolle, ulja e saj rrezikon të përpihet si profit nga shitja dhe të mos reflektohet fare në xhepin e qytetarit.”

Ajo shton se edhe skenarët ekstremë nuk japin garanci për zgjidhje:

“Për më tepër, nëse sot heqim TVSH-në dhe çmimi shkon në 3 Euro, cila do jete zgjidhja tjetër? As heqja totale e TVSH-së nuk e zgjidh krizën nëse shteti nuk ka rezerva të mjaftueshme as plan.”

Rritja e çmimit të naftës mbetet aktualisht një ndër sfidat kryesore ekonomike në vend, ndërsa masat që do të duhej të ndërmerreshin nga institucionet do të ishin  vendimtare për lehtësimin e barrës për qytetarët dhe bizneset./Gazeta Infokus

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-