Ekonomi

Inflacioni në eurozonë nën 2%, BQE ul normat për të tetën herë në një vit

Autori: Gazeta inFokus 15:38 | 05 June 2025

Banka Qendrore Evropiane (BQE) ka ulur normat e interesit në 2%, në një përpjekje për të stimuluar rritjen ekonomike të ngadalësuar në zonën e euros, raporton Reuters.

Kjo ulje shënon të tetën me radhë brenda një viti, ndërsa BQE ka theksuar nevojën për të ulur koston e huamarrjes për 20 vendet anëtare, të goditura nga pasojat e luftës tregtare të nisur nga presidenti amerikan Donald Trump.

Sipas vlerësimeve të Bashkimit Evropian, rritja ekonomike është ngadalësuar ndjeshëm në eurozonë, veçanërisht në Francë, Gjermani dhe Itali, ndërsa parashikimet për vitin e ardhshëm mbeten të dobëta.

-Advertisement-

BQE ka ulur normën kryesore të depozitës nga 2.25% në 2%, pasi inflacioni në eurozonë muajin e kaluar ka rënë në 1.9% – nën objektivin prej 2% për herë të parë që nga shtatori i vitit të kaluar.

Banka ka paralajmëruar se tarifat amerikane do të godasin rritjen, por shpenzimet shtesë qeveritare në mbrojtje do të kompensojnë pjesërisht këtë efekt.

“Ndërsa pasiguria rreth politikave tregtare pritet të ndikojë negativisht në investimet e biznesit dhe eksportet, veçanërisht në afat të shkurtër, rritja e investimeve qeveritare në mbrojtje dhe infrastrukturë do të mbështesë gjithnjë e më shumë rritjen në afat mesëm,” ka thënë BQE.