Sport

Bashkimi fiton ndeshjen e tensionuar në Pejë, kualifikohet në finale

Autori: Gazeta inFokus 21:30 | 01 May 2025

Bashkimi i Prizrenit është finalisti i dytë i plejofit në Superligën e Kosovës në basketboll.

Bashkimi e siguroi finalen të enjten mbrëma në palestrën “Karagaçi” në Pejë. E mposhti skuadrën pejane me rezultat 84:78.

Për Bashkimin ishte fitorja e tretë në serinë gjysmëfinale, sa edhe kërkohen për kualifikim në finale.

-Advertisement-

Ndeshja në Pejë, si shumë ndeshje tjera të plejofit, është përcjellë me incidente. Në fillim të çerekut të katërt një tifoz, që ishte në parket, e goditi me top basketbollistin e Bashkimit, Jayveous McKinnis.

Amerikani iu afrua, ndërsa tifozi e shtyu në trup. Janë afruar edhe lojtarë tjerë të Bashkimit dhe u krijua një tollovi. Tifozët u larguan nga ajo pjesë e parketit dhe ndeshja vazhdoi pas pak minutash. Ndërkohë, tetë sekonda para fundit, në fushën e lojës u hodhën mjete plasëse. Madje një mjet shpërthyer është hedhur shumë pranë këmbëve të Altin Morinës, basketbollistit të Bashkimit. Ndeshja u ndërpre sërish, ndërsa vazhdoi pas largimit të të gjithë tifozëve nga palestra.