Lajme

Zbulohet pllaka përkujtimore e Ismet Rracit, Abdixhiku: Trashëgimia politike e tij vazhdon të jetojë brenda LDK’së

Autori: Gazeta inFokus 13:50 | 25 Prill 2025

Kryetari i Lidhjes Demokratike të Kosovës, Lumir Abdixhiku, ka bërë të ditur se sot është zbuluar pllaka përkujtimore për veprimtarin e njohur të LDK-së, Ismet Rraci, në 24-vjetorin e vrasjes së tij, shkruan Gazeta Infokus.

Në një ceremoni të mbajtur në selinë e LDK-së, në prani të familjarëve, deputetëve dhe anëtarëve të kryesisë, Abdixhiku tha se kjo pllakë do të shërbejë si një kujtesë për veprën dhe kontributin e Rracit dhe të gjithë atyre që sakrifikuan për vendin.

“Kjo pllakë, pjesë e koridorit të përkujtimeve në LDK, krah Enverit, Xhemes e Nekibes, do të shërbejë si shenjë kujtimi për veprën e jashtëzakonshme të burrave e grave të shtëpisë tonë në shërbim të vendit,” shkroi Abdixhiku në një postim.

-Advertisement-

Ai kujtoi se më 24 prill 2001, “familja Rraci humbi më të dashurin e tyre; LDK një veprimtar të pashoq të orëve të rënda; Klina një kryetar komune të zgjedhur me votë demokratike; e Kosova një atdhetar të lëvizjes kombëtare për liri, pavarësi e demokraci.”

Duke folur për trashëgiminë e Ismet Rracit, Abdixhiku tha se ajo mbetet e gjallë brenda Lidhjes Demokratike të Kosovës dhe te familja e tij:
“Trashëgimia politike e Ismet Rracit vazhdon të jetojë brenda Lidhjes. Atë e gjejmë sot më së miri tek tani kryetari i degës sonë në Klinë, Albani, i biri i tij!”

Ismet Rraci ishte një nga themeluesit e Degës së LDK-së në Klinë dhe pas përfundimit të luftës, u zgjodh kryetar i Komunës së Klinës. Ai u vra më 24 prill 2001, pranë hyrjes së banesës së tij, teksa shkonte për në punë. Deri më sot, vrasësit e tij nuk janë zbuluar.