Lajme

Abdixhiku: Perdet sot ranë, numrat dhe arsyet e bllokimit u panë

Autori: Gazeta inFokus 15:26 | 19 Prill 2025

Kryetari i Lidhjes Demokratike të Kosovës (LDK), Lumir Abdixhiku, ka uruar të gjithë deputetët e Kuvendit të Kosovës që kanë dhënë betimin në seancën e sotme, duke përfshirë edhe përfaqësuesit e subjektit që ai udhëheq, shkruan Gazeta Infokus.

Në një postim në rrjete sociale, Abdixhiku theksoi se seanca e sotme vërtetoi qartë se kryeministri në detyrë, Albin Kurti, nuk i ka numrat e nevojshëm për të formuar institucionet, duke e cilësuar këtë si shpjegim për bllokimin institucional të deritanishëm.

“Deputetëve të betuar të LDK-së, dalshi faqebardhë. Urime edhe për të gjithë deputetët e betuar të Kuvendit të Republikës. Perdet sot ranë! Numrat u panë – me ta edhe arsyet e bllokimit institucional deri tash,” ka shkruar ai.

-Advertisement-

Abdixhiku sqaroi se pas pranimit të dorëheqjeve verbale nga Komisioni Verifikues dhe krijimit të rrethanave të reja përmbajtësore, raporti me procesverbal ka njohur dorëheqjet dhe ka rekomanduar verifikimin e mandateve.

Ai nënvizoi se LDK do të vazhdojë të qëndrojë në mbrojtje të rendit kushtetues.

“LDK do të vazhdojë të kujdestarojë dhe mbrojë Kushtetutën – para betimit e pas betimit; si sjellje, si besim,” përfundoi ai, duke e mbyllur me urimin: “Zoti e bekoftë Kosovën dhe popullin tonë!”