Lajme

“Kosova dhe Metohija” nga Prokuroria e Speciales, Çitaku: Fyerje e poshtërim, duhet reagim institucional

Autori: Gazeta inFokus 16:19 | 10 Prill 2025

Nënkryetarja e Partisë Demokratike të Kosovës, Vlora Çitaku, ka reaguar ndaj përdorimit të termit “Kosova dhe Metohija” nga Prokuroria e Gjykatës Speciale, duke e cilësuar atë si një veprim të qëllimshëm dhe të motivuar politikisht, shkruan Gazeta Infokus.

Sipas Çitakut, përdorimi i këtij termi nuk është as lapsus e as gabim i rastësishëm, por një akt i papranueshëm që përbën fyerje të rëndë për qytetarët e Republikës së Kosovës dhe sfidë për sovranitetin e shtetit.

“Përdorimi i termit ‘Kosova dhe Metohija’ nga ana e Prokurorisë së Gjykatës Speciale nuk është lapsus, as gabim i rastësishëm. Është një akt i qëllimshëm, i motivuar politikisht, që përbën jo vetëm një fyerje të rëndë për qytetarët e Republikës së Kosovës, por edhe sfidim të institucioneve dhe shtetit tonë,” ka shkruar ajo në rrjetet sociale.

-Advertisement-

Çitaku e ka quajtur këtë veprim një “poshtërim” dhe “testim të dinjitetit të Kosovës si shtet dhe shoqëri”, duke i bërë thirrje të gjitha institucioneve që të reagojnë urgjentisht dhe me seriozitet.

“Heshtja sot është aprovim nesër. Dhe nëse heshtim tani, historia nuk do të na falë,” përfundoi ajo.