16 organizata joqeveritare dhe disa aktivistë kanë kërkuar që bordi i Radiotelevizionit publik të Kosovës (RTK), të japë dorëheqjen.

Këto organizata përmes një komunikate për media, kanë thënë së publikimi i artikullit të një mediumi boshnjak “Slobodna Bosna”, i cili pastaj është publikuar në RTK ku akuzohen dy media online se janë nën “kontroll” të Serbisë dhe presidentit të saj Aleksandër Vuçiq është narrativë e ushqyer nga Lëvizja Vetëvendosje.

Sipas tyre, qëllimi është denigrimi i gazetarëve e që përbën rrezik për sigurinë e tyre, raporton “Betimi për Drejtësi”.

“Në vend se të suspendonte të gjithë përgjegjësit për lëshimin e kësaj dezinformate, Bordi i RTK-se u mjaftua me një shprehje të “keqardhjes” për artikullin në fjalë dhe formimin e një komisioni për të “sqaruar situatën” duke mos u distancuar apo kërkuar falje. Është tejet shqetësues fakti që artikullin diznformues të publikuar nga RTK-ja, bordi e ka cilësuar si “kontravers” dhe ka deklaruar të pavërteta se kinse RTK nuk ka përmendur emrat e mediumeve”, thuhet në reagim.

Reagimi i plotë i organizatave joqeveritare:

Reagim: Të dorëhiqet bordi i Radiotelevizionit publik të Kosovës

Prishtinë, 24 korrik 2024

Pas situatës së krijuar me rastin e publikimit të artikullit “Slobodna Bosna” (Bosnja e Lirë), të transmetuar në RTK, Organizatat joqeveritare dhe aktivistët e poshtëshënuar kërkojnë dorëheqjen e Bordit të RTK-së për mungesë të pavarësisë dhe profesionalizmit në ushtrimin e mandatit të tyre.

Radiotelevizioni i Kosovës (RTK) ka ri publikuar një informacion dezinformues me qëllim që të sulmojë mediat online Nacionale dhe Persikopi nën pretendimin që kontrollohen nga Serbia. Kjo narrativë e ushqyer ndër vite nga partia në pushtet Lëvizja Vetëvendosje ka për qëllim denigrimin e gazetarëve dhe cytjen e qytetarëve kundër tyre, gjë që përbën rrezik për sigurinë e tyre.

Në vend se të suspendonte të gjithë përgjegjësit për lëshimin e kësaj dezinformate, Bordi i RTK-se u mjaftua me një shprehje të “keqardhjes” për artikullin në fjalë dhe formimin e një komisioni për të “sqaruar situatën” duke mos u distancuar apo kërkuar falje. Është tejet shqetësues fakti që artikullin diznformues të publikuar nga RTK-ja, bordi e ka cilësuar si “kontravers” dhe ka deklaruar të pavërteta se kinse RTK-ja nuk ka përmendur emrat e mediumeve. Kjo është bërë për të zbutur kështu skandalin që i ka ndodhur transmetuesit publik dhe duke anashkaluar faktin se ky lajm bie në kundërshtim me Ligjin e RTK-së, Statutin e RTK-së dhe standardet profesionale. Formimi i komisioneve është metodë e njohur që përdoret për të tej zgjatur procedurat me shpresën që publiku do të harrojë.

Përtej ngjarjes së fundit, një sërë zhvillimesh tjera kanë ndodhur në RTK që japin indikacione të qarta që bordi i transmetuesit nuk funksionon më i pavarur nga partia në pushtet. Këtu përfshihen detyrimi i ish drejtorit gjeneral Shkumbin Ahmetxhekaj që të dorëhiqet dhe ushtrimi i presionit ndaj tij, krijimi i një praktike të publikimit të informacioneve që shkelin standardet etike dhe ligjore siç ishte informacioni për dyshimet për atentate ndaj udhëheqësve të pushtetit, publikimi i videove të ndryshme që i ndihmojnë narratives qeveritare e deri tek lajmet si ky i fundit që për qëllim nuk e kanë informimin e publikut por bërjen e propagandës pro qeveritare.

Rrjedhimisht, ne konsiderojmë që bordi i RTK-së duke bërë lëshime të njëpasnjëshme ka lejuar shtrirjen e dorës së pushtetit në transmetuesin publik dhe nuk gëzon më kredibilitetin dhe pavarësinë e nevojshme për të vazhduar tutje mandatin e tyre dhe duhet të dorëhiqen nga pozitat e tyre.

Njëkohësisht i bëjmë thirrje Lëvizjes Vetëvendosje që të ndalë luftën e ashpër kundër mediave dhe gazetarëve që ka rezultuar me rënien e Kosovës 19 vende në indeksin e Reporterëve pa Kufij.

Organizatat dhe aktivistët nënshkrues:

Lëvizja FOL
Kosovo Law Institute
Kosova Democratic Institute / Transparency International Kosova
Iniciativa per Progres – INPO
Youth Initiative for Human Rights – Kosovo (YIHR KS)
Asociacioni i Gazetarëve të Kosovës – AGK
Prishtina Institute for Political Studies – PIPS
Democracy Plus
Qendra për Informim, Kritikë dhe Aksion – QIKA
Institute for Development Policy (INDEP)
EPIK Institute
Instituti Kosovar për Hulumtim dhe Zhvillim të Politikave (KIPRED)
Imer Mushkolaj
Flutura Kusari
Agon Maliqi
Institute for Social Policy “Musine Kokalari”
sbunker
Democracy for Development (D4D)
Grupi për Studime Juridike dhe Politike

Shkolla Finlandeze lanson programin IMPACT: Tani edhe në gjuhën shqipe, me çmim të përballueshëm

Sponsoruar