Lajme

Haradinaj liston “arritjet historike” të Qeverisë: Sanskione nga BE e SHBA, tenderë njëburimorë, asnjë njohje, asnjë anëtarësim

Autori: Gazeta inFokus 12:20 | 15 July 2024

Kryetari i AAK-së, Ramush Haradinaj ka shkruar për “gropat e zeza buxhetore dhe ‘arritjet historike’ të Qeverisë” në një postim në Facebook ku ka listuar disa nga dëmet që ai thotë se ia ka bërë vendit ky pushtet.

“Kosova është nën sanksione të BE dhe SHBA dhe kjo është e paparë dhe historike. Dëmi deri tash, rreth 300 milionë euro, pra gropë e madhe e buxhetit dhe bajagi historike”, shkroi Haradinaj në krye të kësaj liste.
“Albini e ka implementuar marrëveshjen e 2013-tës për stickersa, targa të veturave dhe sot paska thënë edhe marrëveshjen për energji dhe kjo është historike”, shtoi ai në vijim.

Haradinaj shkroi gjithashtu se kryeministri Albin Kurti “e ka marrë statusin e ‘Veteranit Luftëtar; pa e veshur kurrë uniformën e UÇK dhe pa prekur kurrë armë me dorë, siç e parasheh ligji”. Kjo, thotë ai, “s’ka qenë e lehtë, por është historike përnjëmend edhe goxha njëfarë grope”.

-Advertisement-

“Mbi 250 milionë tenderë njëburimorë (vrima të lavdishme buxhetore) për dosta e miq, janë historike por aspak për të mirë dhe organet e drejtësisë heret a vonë do të kenë shumë punë”, shkroi tutje Haradinaj.

Ai përmendi edhe se s’pati “asnjë njohje për 4 vjet qeverisje, asnjë anëtarësim”.

“Sipas ASK-së qeveritare gjatë qeverisjes së Kurtit, mbi 200 mijë qytetarë e kanë braktisur Kosovën, ani se për filozofët e qeverisë, Kosovën po e braktisin gjyshet”, shkroi Haradinaj.

Ish-kryeministri shkroi se këto “gropa apo vrima të mëdha”, ky kryeministër dhe kjo qeveri “nuk kanë as dije, as vullnet e as kohë t’i sanojnë”.

“Ata tash janë orientu nga zgjedhjet e radhës që janë mashtrimi i radhës”, shkroi Haradinaj në fund.

Subscribe në YouTube: GAZETA INFOKUSI
Etiketa:
Çka do të thotë të gatuash shqip?
-Advertisement-

Të tjera

Fokusi

lajme