Lajme

Gërvalla me vendim ndalon punësimin e familjarëve në MPJD

Autori: Gazeta inFokus 10:56 | 23 April 2024

Ministrja e Punëve të Jashtme dhe Diasporës, Donika Gërvalla, ka marrë vendim për ndalimin e punësimit të anëtarëve të familjes së ngushtë në institucionin që ajo udhëheq.

Vendimin e ka bërë të ditur vetë Gërvalla, përmes një shkrimi në rrjetin social ‘Facebook’, shkruan Gazeta Infokus.

“Nepotizmi, familjarizim, mungesa e theksuar e profesionalizmit dhe llogaridhënies si pasojë e këtyre dukurive, trajtimi i pabarabartë i zyrtarëve në Ministrinë e Punëve të Jashtme dhe atë të Diasporës kanë qenë ndër arsyet kryesore të gjendjes së mjeruar në të cilën e kam gjetur këtë institucion”, shkruan ministrja.

-Advertisement-

Sipas saj ky vendim erdhi nga punësimet që janë bërë në të kaluarën në këtë ministri e që janë të shumta.

“Është i gjatë rreshti i familjarëve të figurave politike dhe publike të punësuara në këtë ministri. I motrave dhe vëllezërve, i grave dhe burrave, djemve dhe vajzave, kunatava, kunetërve dhe baxhanakëve të ministrave, deputetëve, pronarëve të mediumeve, gjyqtarëve e prokurorëve”.

“Nuk është i vogël as numri i anëtarëve të ngushtë të familjes të zyrtarëve të MPJD/së. Deri në katër anëtarë nga e njëjta familje kanë qenë të punësuar në këtë institucion. Familjarë të ngushtë janë dërguar të shërbejnë në të njëjtin mision diplomatik”.

Ndërsa, me këtë vendim ajo ka deklaruar se do t’i jepet fund këtyre dukurive.

“Për t’iu dhënë fund këtyre dukurive kam nënshkruar vendimin me numër 113/2024, i cili ndalon punësimin e familjarëve të afërt të zyrtarëve dhe diplomatëve të Ministrisë së Punëve të Jashtme dhe Diasporës”.

“Vendimin e kam marrë me shumë përgjegjësi, e ndërgjegjshme që do të hasë në kundërshtime të forta nga ana e qarqeve politike dhe mediale, të mësuara me ndërhyrje të tilla, të cilat e dobësojnë shumë strukturën e ministrisë dhe vullnetin e zyrtarëve për të punuar me përkushtim. Por ndaj këtij vendimi nuk ka alternative”./Gazeta Infokus/

Subscribe në YouTube: GAZETA INFOKUSI