Komunikimet ndërmjet deputetëve të grupit parlamentar të Vetëvendosjes vazhdojnë të nxisin shumë reagime.

Nacionale edhe në seancën e sotme ka siguruar një bisedë që është bërë ndërmjet shefes së grupit parlamentar të Vetëvendosjes, Mimoza Kusari-Lila dhe deputetit të VV-së, Halil Thaçi.

Në fotografitë që ka siguruar Nacionale, Kusari-Lila i kërkon deputetit Thaçi të marrë fjalën për të diskutuar rreth kontratave njëburimore. Megjithatë, arsyeja është e çuditshme. Për të blerë kohë.

-Advertisement-

Madje në një pjesë të mesazhit, ajo i lutet deputetit që të mos shajë, por vetëm të bëjë disa pyetje.

“Merre fjalën edhe ti, se po na duhet me ble kohë. Vetëm mos shaj najsen, veq pyetje boni. Dmth, qetë dhe pa tension. Ok?”, i ka shkruar Kusari-Lila deputetit të VV-së.

Krejt ky diskutim duket të jetë bërë pas akuzave nga opozita lidhur me numrin e madh të tenderëve njëburimorë.

Nacionale e ka kontaktuar shefen e grupit parlamentar të VV-së dhe e ka pyetur a ndodhin këso komente rregullisht. Dhe, nëse iu thotë ndonjëherë deputetëve të partisë të shajnë në Kuvend. Megjithatë, ajo nuk ka kthyer përgjigje.

E deputeti Halil Thaçi ka deklaruar për Nacionalen se ai nuk ka qenë në skenar për të marrë fjalën, por që ia kërkoi këtë Kusari-Lilës pasi kishte disa replika.

“Mimoza Kusari po e quani deputete, po ajo është kryetare e grupit parlamentar. Vazhdimisht ne konsultohemi me Mimozën. Unë nuk kam qenë në skenar për të marrë fjalën, se kuptohet në grup parlamentar ne bëjmë skenarin e folësve, është normale ajo. Mirëpo unë kisha disa replika me i bë dhe kisha disa kontrata njëburimore që i kanë bërë anëtarët, ish-ministrat e LDK-së e PDK-së, për këtë arsye e kërkova fjalën prej Mimozës, ajo më shkrujti që mundesh me marrë fjalën, por s’e mora përsëri sepse përfundoi”, tha deputeti Thaçi për Nacionalen.

I pyetur pse Kusari-Lila i ka thënë të mos shajë, Thaçi deklaroi se është habitur pse e ka thënë atë fjalë pasi shefja e deputetëve të VV-së është e kujdesshme.

“Jo, s’ka raste kur thotë Mimoza shaje, s’di pse i kish dalë mos shaj najsen, në atë kuptimin e ofendimeve e ka pas. Unë javën e kalume edhe Nacionale e ka postu, problemin me Hykmete Bajrami qysh erdh te ulësja ime, absolut, sidomos Mimoza është shumë e kujdesshme në këto gjëra, se di pse kah ka i ka dalë qajo mos shaj. S’ka ndodh me sha asnjëherë”, tha Thaçi për Nacionalen.

Nacionale vitin e kaluar publikoi disa biseda ku po deputeti Thaçi fliste për disa punësime në KEK, dhe e akuzonte Luigj Imerin për arrestimin e Nagip Krasniqit.

Më pas, Nacionale publikoi biseda të tjera që tregonin se si Dejona Mihali jepte urdhër për votimin e komisioneres së FSK-së.

Kurse, ditë më parë Nacionale publikoi bisedat e deputetes Adriana Matoshi me Dejona Mihalin, ku kjo e fundit i tregonte çka të shkruante në rrjete sociale kundër analistëve.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-