Sport

Shabani shpall listën për dy ndeshjet e Kosovës ndaj Polonisë

Autori: Gazeta inFokus 16:54 | 26 Mars 2024

Selektori i Kosovës në hendboll, Agron Shabani, ka shpallur të martën listën e lojtareve në të cilat llogarit për dy ndeshjet shumë të rëndësishme me Poloninë.

Kosova e Polonia takohen në kuadër të fazës kryesore kualifikuese për “Euro 2024”.

Ndeshja e parë është më 4 prill nga ora 17:45 në Prishtinë. Ndeshja e dytë zhvillohet më 7 prill në Zielona Gora të Polonisë.

-Advertisement-

Kosova e Polonia janë në Grupin 8, ku bënë pjesë edhe Danimarka. Danezet i kanë fituar të gjitha katër ndeshjet e deritashme dhe tashmë janë kualifikuar në Evropian.

Polonia llogaritet favorite ndaj Kosovës, por Federata e Hendbollit e Kosovës (FHK) bëri të ditur se “vajzat tona do të japin maksimumin për të shënuar një fitore, që me shumë mundësi do të mjaftonte për kualifikim në Evropian”.

“Dardanet” pritet të kenë përkrahje të madhe në ndeshjen në Prishtinë, ku synohet të befasohet Polonia.

Grumbullimi i Kombëtares së Kosovës është më 29 mars në Prishtinë. Deri në ditën e ndeshjes Kombëtarja i ka nga dy stërvitje në ditë.

Selektori Shabani është bazuar në grupin e lojtareve tashmë të konfirmuara, ndërsa rastin ua ka dhënë edhe disa lojtareve të reja. Për shkak të obligimeve personale, në këtë grumbullim mungon aloja Fitore Aliu.