Komandanti i KFOR-it, gjeneralmajor Ozkan Ulutash, ka vlerësuar sot se situata në Kosovë është përgjithësisht e qetë, por ende e ndjeshme.

Ai në një intervistë për Tanjugun e Serbisë ka thënë se NATO-ja, pas rritjes së tensioneve në muajt e fundit, ka dislokuar qindra ushtarë shtesë, më saktësisht ka katërfishuar praninë e KFOR-it në veri të Kosovës dhe ka trefishuar numrin e patrullave, ndër të tjera në kufirin me Serbinë.

“Misioni ynë aktualisht numëron rreth 5000 personel nga 28 vende anëtare dhe partnerë të NATO-s. Qëllimi i këtyre hapave të kujdesshëm është të sigurojnë që misioni i KFOR-it të vazhdojë të përmbushë mandatin e tij të OKB-së, i cili bazohet në Rezolutën 1244 të Këshillit të Sigurimit të Kombeve të Bashkuara nga viti 1999, e i cili është të sigurojë një mjedis të sigurt për të gjitha komunitetet që jetojnë në Kosovë, si dhe lirinë e lëvizjes, në mënyrë të paanshme dhe në çdo kohë”, citohet të ketë thënë Ulutash.

-Advertisement-

Tutje ai theksoi se KFOR-i do të vazhdojë të bëjë përpjekje për të parandaluar çdo përshkallëzim dhe se është i gatshëm t’i përgjigjet çdo sfide, përmes përshtatjes së mëtejshme të pozicionit të tij, nëse është e nevojshme.

“Si i treti në zinxhirin e reagimit, do të vazhdojmë të punojmë ngushtë me Policinë e Kosovës dhe Misionin e Bashkimit Evropian për Sundimin e Ligjit (EULEX) si të parët dhe të dytët në zinxhirin e reagimit. Do ta përsëris atë që tha Sekretari i Përgjithshëm i NATO-s gjatë vizitës së tij të fundit në Ballkanin Perëndimor në nëntor: “Stabiliteti në rajon varet nga të gjitha palët që zgjedhin diplomacinë në vend të dhunës. NATO mbështet fuqishëm dialogun midis Beogradit dhe Prishtinës nën kujdesin e BE-së dhe të dyja palët duhet të veprojnë me mirëbesim”, tha Ulutaşh.

I pyetur se si i komenton pretendimet e Prishtinës se Serbia po përgatit një sulm në veri të Kosovës, të cilat Beogradi i hodhi poshtë si të pasakta dhe të pabaza, komandanti i KFOR-it u shpreh se nuk dëshiron të spekulojë për asnjë skenar dhe se KFOR-i po monitoron me kujdes të gjitha zhvillimet relevante të sigurisë në rajon.

“Ne jemi në kontakt të ngushtë me Shefin e Shtabit të Ushtrisë Serbe, institucionet në Kosovë dhe organizatat e sigurisë së Kosovës, si dhe organizata të tjera, duke përfshirë EULEX-in, OSBE-në dhe UNMIK-un”, shtoi ai.

Duke komentuar deklaratën e përfaqësuesve të Prishtinës se Forcat e Sigurisë së Kosovës, nëse është e nevojshme, shkojnë në veri, ushtaraku thekson se Stoltenbergu ishte shumë i qartë për këtë çështje gjatë vizitës së tij të fundit në Prishtinë kur theksoi se “çdo vendosje e FSK-së në veri kërkon pëlqimin e KFOR-it”.

Tutje kreu i KFOR-it shtoi se do të vazhdojnë të mbështesin dialogun midis Beogradit dhe Prishtinës nën patronazhin e BE-së duke ofruar kornizën e sigurisë të nevojshme për diplomacinë. Sipas tij, kjo është rruga e vetme drejt paqes dhe stabilitetit të përhershëm, në të mirë të të gjitha komuniteteve që jetojnë në Kosovë.

Duke folur për njoftimin e Shqipërisë dhe Gjermanisë për dërgimin e forcave shtesë në KFOR, Ulutaş u shpreh se NATO është e vendosur fort për sigurinë në Kosovë dhe se KFOR-i do të qëndrojë për aq kohë sa të jetë e nevojshme.

Sipas tij, misioni në Kosovë që nga fillimi është bazuar në kushtet në terren, e jo në afate të paracaktuara, që do të thotë se të gjitha ndryshimet në numrin e personelit do të bazohen në vlerësimet e kushteve në terren, pasuar me vendim të Këshillit të Atlantikut të Veriut.

“Njoftimet e reja për përforcimin e misionit janë pasqyrim i vendosmërisë së aleatëve të NATO-s për të siguruar që KFOR-i të ketë një prani të përshtatshme në terren, në mënyrë që të vazhdojë të përmbushë mandatin e tij të OKB-së në një situatë të karakterizuar nga tensionet që kemi parë muajt e kaluar”, sqaroi Komandanti i KFOR-it, gjeneralmajor Ozkan Ulutash./rtv

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-