Ibrahim Lushtaku dhe Xhelal Zeqiri, të cilët po akuzohen për tentim vrasjen e avokatit Gazmend Halilaj, janë mbrojtur në heshtje.

Të njëjtit kanë qëndruar pranë deklaratave të dhëna në prokurori dhe gjykatë.

Paraprakisht, në këtë seancë është bërë shikimi i disa video-incizimeve të dorëzuara nga prokurorja e shtetit Bukurije Gjonbalaj, ku shihej vetura e vozitur nga i akuzuari Lushtaku.

Sipas saj, në këto video-incizime shihet vetura e cila është përdorur në kryerjen e veprës penale një ditë para ndodhjes së rastit e cila ka kaluar në këtë rrugë, e në të cilën rrugë edhe i dëmtuari ka shtëpinë.

“Po e njëjta veturë në të njëjtën rrugë dhe ditë shihet edhe tre herë dhe atë në ora 10:19, 10:37 dhe 10:38, me të cilën veturë të pandehurit kanë kryer veprën penale ku fillimisht duke goditur me këtë veturë veturën e të dëmtuarit, kanë kryer veprën penale vrasje në tentativë, duke e goditur me dashje edhe pse rruga ka qenë dykahëshe…”, ka thënë prokurorja Gjonbalaj.

Lidhur me këtë, mbrojtësi i të akuzuari Lushtaku, avokati Tahir Rrecaj ka dhënë vërejtjet e tij në vlerësimet e prokurorisë, veçanërisht në vlerësimin e saj të fundit ku pretendon se vepra penale e vrasjes në tentative është tentuar të kryhet me veturën e të akuzuarit Ibrahim Lushtaku, raporton “Betimi për Drejtësi”.

Kurse, mbrojtësi i të akuzuarit Xhelal Zeqiri, avokati Jeton Maqedonci tha se vërejtjet e tij do t’i japë në fjalën përfundimtare.

Më pas, prokurorja Gjonbalaj ka kërkuar që seanca e sotme të ndërpritet dhe të vazhdohet për një datë tjetër dhënia e fjalës përfundimtare, meqenëse nuk e kishte përgatitur të njëjtën.

Ndryshe, sipas kryetares së trupit gjykues, gjykatëses Alltën Murseli, i dëmtuari Gazmend Halilaj sot përmes email ka njoftuar gjykatën se i njëjti nuk mund të jetë i pranishëm për shkaqe shëndetësore, duke kërkuar që seanca të mbahet pa prezencën e tij.

Ndryshe, në këtë rast i akuzuari ka qenë edhe ish-kryetari i Komunës së Skenderajt, Sami Lushtaku, i cili pasi ka pranuar fajësinë, është shpallur fajtor për kanosjen e avokatit Gazmend Halilaj.

Më 28 tetor 2020, Lushtaku si dhe i akuzuari Zeqiri e kishin pranuar fajësinë vetëm për veprën penale të armëmbajtjes pa leje, derisa ishin deklaruar të pafajshëm për veprën penale të vrasjes së rëndë në tentativë.

Ibrahim Lushtaku nuk e kishte e pranuar fajësinë as për veprën penale të asgjësimit apo dëmtimit të pasurisë.

Sipas aktakuzës, pasi që avokati Gazmend Halilaj kishte bërë një shkrim në rrjetin social “Facebook”, më 11 prill 2020, kundër Sami Lushtakut, kushëriri i këtij të fundit, Ibrahim Lushtaku, me qëllim të hakmarrjes dhe në bashkëkryerje edhe me të akuzuarin Zeqiri, më 14 prill 2020, ia kishin zënë pritën Halilajt.

Në aktakuzë thuhet se, me të parë Halilajn, i akuzuari Ibrahim Lushtaku me dashje që ta privojë nga jeta, e ka goditur fuqishëm veturën e të dëmtuarit Halilaj, ashtu që në këtë moment ky i fundit kishte dalë nga vetura dhe kishte filluar të ikë. Sipas aktakuzës, edhe të akuzuarit Lushtaku dhe Zeqiri kishin dalë pastaj nga vetura dhe kishin shtënë me armë në drejtim të Halilajt por nuk kishin arritur ta godasin.

Me këto veprime, prokuroria i akuzon Ibrahim Lushtakun dhe Xhelal Zeqirin se kanë kryer veprën penale të vrasjes së rëndë të mbetur në tentativë.

Për shkak se i kishte shkaktuar dëme në lartësi prej 2 mijë e 700 euro veturës së të dëmtuarit Halilaj, Ibrahim Lushtaku akuzohet nga prokuroria edhe për veprën penale të “asgjësimit apo dëmtimit të pasurisë”.

Po ashtu, Ibrahim Lushtaku dhe Xhelal Zeqiri akuzohen edhe se në kundërshtim me ligjin për armët kanë mbajtur armë pa leje. Lushtaku akuzohet se ka mbajtur pa leje një revole të tipit “Ekol”, kurse Zeqiri një armë të tipit “Crvena Zastava”.

Me këtë, të dy këta akuzohen për veprën penale “Mbajtja në pronësi, kontroll ose posedim të paautorizuar të armëve”.

Zbritje dhe plot 5 dhurata – Oferta spektakulare e dyshekëve Comodita

Sponsoruar