Lajme

“Morën peng pronarin, duart me lidhëse plastike”, detaje të reja nga grabitja e argjendarisë në Suharekë

Autori: Gazeta inFokus 19:45 | 01 December 2023

Gjykata Themelore në Prizren, Departamenti i Krimeve të Rënda, gjyqtarja e procedurës – Teuta Krusha ka caktuar masën e paraburgimit ndaj katër të dyshuarve për përfshirje në grupin e armatosur kriminal që kryen grabitje në një argjendari në Suharekë.

Gjykata ka thënë detaje të kryerjes së grabitjes në Prizren.

“…në atë mënyrë që të pandehurit B.B., B.I., K.G., D.G., dhe L:C., që të gjithë të maskuar, të veshur me rroba të zeza dhe me doreza në duar, të gjithë të pajisur me armë frontale të gjata, njëri prej tyre me armë të gjatë në duar kryen rolin e rojës ndërsa të tjerët futen brenda në argjendari dhe nën kërcënimin e armëve marrin peng pronarin e lokalit të cilin e lidhin me lidhëse plastike për të neutralizuar rezistencën e tij dhe pastaj fillojnë me grabitjen e arit duke demoluar vitrinat dhe xhamat, ku edhe arrijnë të marrin ari duke shkaktuar humbje në shkallë të madhe dhe ashtu të maskuar dhe me armë të gjata në duar, me veturën e markës “Chevrolet Cruze” ngjyrë hiri me targa ……., largohen në drejtim të rrugës “Avdyl Rama” për të vazhduar nga fshati Sopijë e në drejtim të fshatit Budakovë, që lidhet me fshatin Jezercë të Ferizajt, nga ku edhe bëhen të pa arritshëm, ndërsa me datë 30 nëntor 2023, të pandehurit B.B., B.I., dhe L.C., arrestohen nga Policia.”, thotë Gjykata.

-Advertisement-

Gjykata ka vlerësuar profilin e të arrestuarve dhe ka konsideruar se masa e paraburgimit është e domosdoshme dhe e arsyeshme marrë parasysh rrezikun potencial të tyre.