Në Gjykatën Speciale, ka nisur dëshminë dëshmitari i 36-të ndaj ish krerëve të Ushtrisë Çlirimtare të Kosovës.

Dëshmia e këtij dëshmitari ka nisur në seancë private, pas kërkesës së trupit gjykues.

Prej mbi 300 dëshmitarëve, deri më tash janë dëgjuar 35 prej tyre – shqiptarë, serbë, ekspertë ndërkombëtarë, ish-komandantë të UÇK-së e viktima të pretenduara të luftës – kryesisht në seanca të mbyllura për publikun, ndërsa këtë të hënë pritet të vazhdojë dëgjimi i dëshmitarit të 36-të.

Ish-ambasadori i Kosovës në Maqedoninë e Veriut, Gjergj Dedaj, ka dëshmuar kundër ish-komandantëve të UÇK-së, përkundër, siç ka thënë, vullnetit të tij. Ai është përgjigjur në pyetjet për ndalimin e mbi 10 deputetëve të Lidhjes Demokratike të Kosovës (LDK) gjatë një vizite në fshatin Qirez të Skënderajt dhe është përballur me disa deklarata nga e kaluara.

Ndërkaq, dëshmitari i 34-të në rastin e krerëve të UÇK-së, Dragan Ivaneseviç, ish-pjesëtar i Ushtrisë së Serbisë gjatë luftës në Kosovë, ka pretenduar para trupit gjykues se është “rrëmbyer” së bashku me një tjetër serb në shkurt të vitit 1999, Velko Markoviç, i cili edhe sot pandehet sikur person i zhdukur.

Dëshminë e tij e ka dhënë edhe dëshmitari 35-të, shqiptar etnik. Ai ka pretenduar të jetë arrestuar e rrahur nga pjesëtarë të UÇK-së gjatë luftës. Megjithatë, ekipi mbrojtës i ish-eprorëve të UÇK-së ka gjetur shumë kontradikta nga dëshmitë e dhëna në të kaluarën. Një herë kishte thënë se është “rrahur 20 minuta”, ndërsa më pas “1 orë”.

Ditët e fundit janë karakterizuar me disa aksione të Zyrës së Prokurorit të Specializuar (ZPS) në Kosovë. Misioni i Bashkimit Evropian për Sundim të Ligjit (EULEX) nën asistencën e Policisë së Kosovës, ka bastisur shtëpinë e Ismail Sylës, ish-këshilltar politik i ish-presidentit Thaçi.

Një bastisje nga ZPS-ja ka ndodhur edhe në banesën e Artan Behramit, ish-këshilltar politik i ish-kreut të shtetit, ndërsa EULEX-i me urdhër të ZPS-së ka kryer bastisje edhe në banesën e Blerim Shalës, i cili për një kohë ka shërbyer gjithashtu në ekipin këshilldhënës të ish-presidentit Thaçi.

EULEX-i ka kryer aksionin e njëjtë edhe në shtëpinë e ish-drejtorit të Agjencisë Kosovare të Inteligjencës (AKI), Bashkim Smaka, i cili përveç pozitës së kryespiunit, ka shërbyer edhe në ekipin e ish-shefit të shtetit. Edhe në shkurt të këtij viti ishin kryer bastisje të ngjashme.

E gjykimi ndaj ish-krerëve të UÇK-së ka nisur më 3 prill të këtij viti, pas më shumë se dy vjet nga konfirmimi i aktakuzës. ZPS-ja ka shpalosur aktakuzën kundër katër ish-drejtuesve të Shtabit të Përgjithshëm të UÇK-së e që është barazvlerësuar me një “ndërmarrje të përbashkët kriminale” pa asnjë dëshmi

Spektakli i Vitit, Ekskluzivisht në Artmotion – BBVK3!

Sponsoruar