Bella Hadid është një nga gratë më të njohura me prejardhje palestineze sot në planet. Nga ana e babait të saj, Mohammed Hadid, Bella Hadid është palestineze, ndërsa nga ana e nënës së saj, Yolanda, ajo ka trashëguar prejardhjen holandeze.

Lufta mes Izraelit dhe Hamasit ka nisur që në dhjetëditëshin e parë të tetorit dhe ndjekësit e modeles në Instagram prisnin që ajo të ishte një nga personazhet e para të famshme që do të postonte për atë që po ndodh sërish në Gazën e shumëvuajtur. Asaj iu deshën disa ditë për të reaguar, por Bella Hadid më në fund foli për të gjitha në një postim të gjatë në Instagram të enjten, 26 tetor.

Përveç tekstit të saj, Bella Hadid postoi një video të një krijuesi palestinez të përmbajtjes duke folur për mënyrën sesi palestinezët kanë mësuar të jetojnë në rrënoja, por në solidaritet. Postimi i saj nisi me një kërkim falje për heshtjen e saj në javët e mëparshme, një heshtje që ishte vënë re nga fansat e saj në mbarë botën.

-Advertisement-

Që nga fillimi i luftës, Bella Hadid ka pohuar se ka marrë “qindra kërcënime kundër jetës sime çdo ditë” dhe se familja e saj ndihet “në rrezik”, por refuzon të heshtë më.

“Zemra ime rrjedh gjak nga trauma që shoh duke u shpalosur, si dhe nga trauma transgjenerative e gjakut tim palestinez. Duke parë efektet e bombardimeve në Gaza më bën të vajtoj për të gjitha nënat që kanë humbur fëmijët dhe të gjithë fëmijët që kanë mbetur vetëm, të gjithë baballarët, vëllezërit, motrat, xhaxhallarët, hallat, miqtë e humbur që nuk do të ecin më në rrugë.

Unë vajtoj për familjet e izraelitëve që duhet të përballen me dhimbjen dhe pasojat e 7 tetorit. Pavarësisht historisë së vendit, unë dënoj sulmet terroriste ndaj çdo qytetari, kudo. Dëmtimi i grave dhe fëmijëve dhe imponimi i terrorit nuk i sjellin dhe nuk duhet t’i bëjnë asnjë të mirë lëvizjes për Çlirimin e Palestinës. Unë besoj thellë në zemrën time se asnjë fëmijë, asnjë njeri askund nuk duhet të ndahet nga familja e tij, përkohësisht ose pafundësisht. Kjo është e vërtetë si për izraelitët ashtu edhe për palestinezët”, ka shkruar Bella Hadid.

Më pas, megjithatë, ajo shpjegoi disa gjëra në lidhje me origjinën e saj palestineze dhe pse prej vitesh mbështet kauzën e Lëvizjes Çlirimtare të Palestinës. “Është e rëndësishme të kuptojmë vështirësitë e asaj që do të thotë të jesh palestinez, në një botë që na trajton si asgjë më shumë se terroristë që i rezistojnë paqes”, tha ajo. “Është e dhimbshme, e turpshme dhe kategorikisht e rreme”.

Babai i saj, Mohamed Hadid, lindi në Nazaret në vitin 1948, në të njëjtin vit kur 750,000 palestinezë u dëbuan nga shtëpitë e tyre dhe u bënë refugjatë, sipas asaj që shkroi Bella Hadid. “Familja ime ka dëshmuar 75 vjet dhunë kundër palestinezëve, duke përfshirë inkursione të dhunshme të kolonëve që kanë çuar në shkatërrimin e komuniteteve të tëra, vrasje gjakftohtë dhe dëbime me forcë të familjeve nga shtëpitë e tyre. Praktikat e vendosjes në tokën e palestinezëve që ndodhin edhe sot e kësaj dite”, ka shkruar modelja.

Bella Hadid sheh një të ardhme ku njerëzit mund të “bashkohen në mbrojtje të njerëzimit dhe dhembshurisë” dhe të kundërshtojnë “qeveritë e korruptuara”, pavarësisht se në cilën anë janë. “Ne jemi një dhe Zoti na ka krijuar të barabartë. Të gjitha gjakderdhjet, lotët dhe kufomat duhet të vajtohen me të njëjtin respekt”, theksoi Bella Hadid.

Në mbyllje, Bella Hadid u kërkoi njerëzve të ndihmojnë në përballimin e krizës aktuale humanitare në Gaza, ku njerëzve u mungon aksesi në ujë të pastër, energji për të drejtuar spitalet e tyre dhe furnizime mjekësore për të trajtuar të plagosurit. “Luftërat kanë ligje dhe ato duhen respektuar me çdo kusht”, vuri në dukje modeli dhe u kërkoi të gjithëve të vazhdojnë presionin ndaj liderëve botërorë për të “siguruar që jetët e pafajshme të qytetarëve të Palestinës të mos bëhen viktima të harruara kolaterale të luftës”.

“Unë qëndroj me njerëzimin, duke e ditur se paqja dhe siguria na përkasin të gjithëve ne”, përfundoi Bella Hadid.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-