Kancelari i Austrisë, Karl Nehammer, ka folur sot rreth trazirave në veri, duke thënë se palët po bëjnë hapa që e pamundësojnë de-eskalimin e situatës.

Nehammer fajësoi institucionet e Kosovës, pasi siç tha ai, nuk e kanë ndërmarrë asnjë hap për ta de-eskaluar situatën.

“Kur jemi tek kjo situatë, institucionet kosovare nuk e kanë ndërmarrë asnjë hap për ta de-eskaluar situatën. Është shumë e rëndësishme që dhuna të ndalet. Dhuna është çdoherë e papranueshme”, tha ai para mediave në margjinat e Samitit të Liderëve Evropianë në Moldavi.

-Advertisement-

Kancelari austriak theksoi Serbia është një vend shumë i rëndësishëm në Ballkanin Perëndimor.

“Ka ndikim të madh në de-eskalimin e konflikteve. Por, për të de-eskaluar duhen dy vende. Duhet edhe Kosova”, deklaroi ai.

Ndërkohë, edhe presidenti i Francës, Emmanuel Macron, dje tha se autoritetet e Kosovës “mbajnë përgjegjësi për trazirat, të cilat janë rritur ndjeshëm” në veri të Kosovës, prej se kryetarët e rinj shqiptarë kanë marrë detyrën në komunat me shumicë serbe.

Macron i bëri komentet në një konferencë për sigurinë në Bratisllavë

Fajin për trazirat në veri, autoriteteve të Kosovës ua kanë lënë shumica e vendeve mike ndërkombëtare, me SHBA-në që dje njoftoi edhe sanksione ndaj Kosovës, ku përfshihej moslejimi i Kosovës për pjesëmarrje në stërvitjet Defender Europe 2023, moslobimi në shtetet mosnjohëse, si dhe ndalimi i vizitave Kosovë – SHBA për zyrtarët shtetërorë, njofton Reporteri.

Rreth situatës në veri sot foli edhe presidentja Vjosa Osmani, e cila tha se është në Samitin e Liderëve Evropianë në Moldavi për të kërkuar përkrahjen e aleatëve të Kosovës në ndaljen e veprimeve destabilizuese të Serbisë në veri.

Osmani tha se presidenti serb, Aleksandar Vuçiq është i interesuar që përmes bandave kriminale të destabilizojë vendin tonë.

“Ne si rajon, në veçanti si Kosovë jemi përballë sfidave të tilla sepse Serbia vazhdimisht ka shërbyer si satelit i Rusisë në rajonin tonë duke tentuar ta destabilizojë Kosovën, por edhe shtetet tjera të rajonit. Jam këtu sot për të kërkuar përkrahjen e partnerëve tanë që ti luftojmë këto tendenca destabilizuese, që të luftojmë së bashku për sundim të ligjit dhe të parandalohet ndikimi edhe i propagandës, por edhe i këtyre tendencave. Vuçiqi është i interesuar që përmes bandave kriminale të destabilizojë vendin tonë. Nuk duhet assesi të lejojmë një gjë të tillë, prandaj koordinimi me aleatët tanë të cilët kanë qëndruar pranë nesh përgjatë kohëve më të vështira por edhe përgjatë sukseseve, është kyçe në mënyrë që edhe të shtensionohet situata, por edhe të shtyjmë përpara ide, propozime të cilat kontribuojnë për paqe e stabilitet”, ka thënë Osmani para mediave.

Ajo shtoi se përveç presidentit francez Macron dhe kancelarit gjerman Scholz, sot do të ketë takime edhe po thuajse të gjithë liderët evropianë që marrin pjesë në këtë Samit.

Kryeministri Albin Kurti rrugëdaljen nga tensionet në veri e ka përshkruar si “hekurudhë të drejtë me dy binarë”.

Kurti ka thënë se fillimisht duhet të tërhiqen huliganët nga rrugët e pastaj të ulet numri i policisë së pranishme në veri, dhe në të njëjtën kohë të avancohet me implementimin e marrëveshjes.

Kurti në Bratislavë ka thënë se mesazhi i SHBA-së ishte i fortë dhe se po përpiqen që të gjejnë rrugëdalje.

“Ju pyetët a jeni i frikësuar, apo i brengosur. Jam i brengosur gati gjithë kohën, po nuk frikësohem. Sepse prapë është përshkrim i punës që të mos frikësohem, por të brengosem. SHBA-ja ka përçuar një mesazh të fuqishëm, po përpiqemi fort që të gjejmë rrugëdalje, dhe rrugëdalja nuk duhet të jetë rrugë e lakuar, por një hekurudhë. Dy shina, dy binarë së pari të dalim nga kriza në veri, që do të thotë sundim i së drejtës: huliganët ose kthehen në Serbi, ose burgosen në Kosovë dhe pastaj të ulim praninë e policisë në objekte komunale dhe normalizojmë situatën.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-