Edhe pse vendimi është i nënshkruar nga Ministrja e Punëve të Jashtme, Donika Gërvalla-Schwarz, e cila merret vetëm emërime diplomatike e konsullore, ndaj raportimit për emërimin e Vehbi Miftarit si “përfaqësues” për kontakte në Selinë e Shenjtë, ka reaguar Zyra e presidentes, Vjosa Osmani.

Këshilltari për media i presidentes, Bekim Kupina, përmes një sqarimi të dërguar në Demokracia.com ka thënë se emërimi është bërë në përputhje me praktikat e mëhershme, pa treguar cilat janë ato praktika.

“Këshilltari i Presidentes nuk është emëruar të shërbejë në ndonjë mision diplomatik e as nuk do të marrë ndonjë grade diplomatike. Do të mbajë kontakt me Selinë e Shenjtë, si person kontaktues nga Kosova, në përputhje të plotë me praktikat e mëhershme të institucioneve dhe në përputhje të plotë me ligjet në fuqi. Prandaj lajmi i publikuar nga ana juaj është i pasaktë”, ka thënë Kupina.

Megjithatë, sipas burimeve brenda MPJ-së, nuk ekziston asnjë praktikë e mëhershme që Ministrja e Jashtme emëron këshilltar të një presidenti si persona kontaktues me Selinë e Shenjtë, sepse kontaktet mbahen nga diplomatët e Kosovës. Emërimet e mëhershme mësohet se kanë qenë pjesë e rrjetit diplomatik.

Edhe në vendimin e ministres Gërvalla-Schwarz, duke iu referuar vendimit të presidentes nr. 61/2021, dt. 06.10.2021, theksohet qartë se Vehbi Miftari caktohet të shërbejë në Misionin Diplomatik të Republikës së Kosovës në Romë/Itali.

Demokracia.com ka insistuar të marrë përgjigje plotësuese nga këshilltari i presidentes Osmani lidhur me praktikat e mëhershme, por më nuk kemi pranuar përgjigje.

Këshilltari i presidentes Vjosa Osmani, Vehbi Miftari, sipas vendimit të çuditshëm të ministres Gërvalla-Schwarz, do të paguhet sa një Ministër Këshilltar, që sipas burimeve brenda MPJ-së paga mujore sillet në afër 3 mijë euro. Edhe pse precizohen se të ardhurat personale të Miftarit do të jenë të barasvlershme me gradën diplomatike Ministër Këshilltar, sipas këtij vendimi, kjo ekuivalencë nuk nënkupton marrjen e kësaj grade. Nëse llogariten edhe shpenzimet e banimit dhe shpenzimet e tjera që pritet t’i ketë si “përfaqësues” i Republikës së Kosovës në Vatikan, shpenzimet e Miftarit në total për 4 vitet e ardhshme mund të arrijnë në rreth gjysmë milioni euro. /Demokracia.com/

MYZHDE për krejt!

Sponsoruar