Sport

Njihuni me 2 lojtarët që ndryshuan Arsenalin, tani “topçinjtë” janë për titull!

Autori: Gazeta inFokus 13:50 | 08 November 2021

3 humbjet në 3 javët e para të sezonit janë një kujtim i largët për Arsenalin që në 8 ndeshjet e fundit ka patur një ecuri perfekte në Premier League me 6 fitore dhe 2 barazime.

Një ndryshim rrënjësor i skuadrës së Mikel Artetës me trajnerin spanjoll që ka ditur të gjejë ekulibrat në skuadër sidomos në fazën mbrojtëse duke marrë edhe duartrokitjet e tifozëve të cilët tashmë duan që spanjolli të vazhdojë gjatë në stolin e topçinjëve. Me 20 pikë të grumbulluara në 8 ndeshjet e fundit, Arsenali tashmë e sheh veten në vendin e 4-t të renditjes dhe -6 pikë larg kryesuesve të Chelsea-t.

Dy nga më të vlerësuarit te Arsenali gjatë kësaj periudhe kanë qenë dy nga afrimet e kësaj vere, qëndërmbrojtësi Ben White që u ble nga Brighton për shifrën e konsiderueshme të 58,5 milionë eurove por edhe portieri Aaron Ramsdale që erdhi nga Sheffield United për 28 milionë euro, kjo edhe për faktin që në 3 humbjet e para sezonale White u aktivizua vetëm në disfatën ndaj Brentford në ndeshjen hapëse të kampionat sepse ndaj Chelsea-t dhe City-t mungoi për arsye dëmtimi ndërkohë që Ramsdale debutimin e bëri pikërisht në sfidën që nisi kthesa e topçinjëve në Premier League në fitoren minimale 1-0 ndaj Norëich City në javën e 4-t.

-Advertisement-

Në 8 ndeshjet e fundit Arsenali ka pësuar vetëm 4 gola me një mesatare me gjysmë goli për ndeshje dhe një pjesë të meritave për këtë i ka dyshja Ben White-Aaron Ramsdale. Qëndërmbrojtësi 23-vjeçar i ka sjellë skuadrës së Artetës sigurinë e munguar gjatë këtyre sezoneve të fundit në repartin e prapavijës ndërkohë që portieri Ramsdale me pritjet e tij shpëtimtare ka evituar në shumë raste gola të sigurtë. Nga humbja turpëruese 5-0 ndaj Manchester City-t te suksesi i fundit 1-0 ndaj Watford, Arsenali i Mikel Artetës në vetëm 2 muaj ka ndryshuar fytyrë. Ndeshja e radhës është ajo ndaj Liverpoolit në Anfield një sfidë delikate dhe shumë e vështirë por që topçinjtë mund ta luajnë pa frikë.

Subscribe në YouTube: GAZETA INFOKUSI