Banka Botërore planifikon ta mbështesë Kosovën me mbi 120 milionë euro për menaxhimin dhe zbutjen e ndikimit të COVID-19.

Ky program përfshin një projekt të ri me procedura të përshpejtuara për t’iu përgjigjur prioriteteve urgjente të sektorit të shëndetësisë dhe për të mbrojtur të ardhurat e ekonomive familjare, shkruan gazeta inFokus.

Këtë e ka konfirmuar Marco Mantovanelli, Menaxher i Bankës Botërore për Kosovën, sipas një njoftimi të zyrës së Bankës Botërore në Kosovë.

-Advertisement-

“Banka Botërore është e përkushtuar të mbetet partner i fortë për Kosovën gjatë këtyre kohërave të vështira dhe ekipet tona po punojnë për t’i ndihmuar Kosovës dhe për t’iu përgjigjur sa më shpejt krizës së COVID-19”, ka thënë Mantovanelli.

Sipas të dhënave përfshin ristrukturimin e projekteve tashmë të aprovuara për të mobilizuar fondet në mbështetje të NVM-ve, si dhe mbështetje buxhetore për rimëkëmbjen ekonomike dhe për t’i ndihmuar autoritetet që të plotësojnë nevojat e tyre të financimit shkruan gazeta inFokus.

Megjithatë, këto para nuk mund të vijnë në Kosovë pa ratifikimin e marrëveshjes në Kuvendin e Kosovës.

“Pas aprovimit nga Banka Botërore, është i nevojshëm nënshkrimi i shpejtë i marrëveshjes nga Qeveria si dhe ratifikimi nga Kuvendi për të siguruar që fondet janë në dispozicion për të përfituar Kosova dhe qytetarët e saj”, ka bërë të ditur kreu I zyrës për Kosovë Marco Mantovanelli.

Kjo ndihmë vjen pas situatës së rëndë të krijuar në ekonominë e vendit për shkak të ndikimit të pandemisë së coronavirusit.

Gazeta inFokus ka raportuar se ekonomia e Kosovës ka marrë goditjen më të madhe që nga paslufta.

Banka Botërore në raportin e fundit për vendet e Ballkanit Përëndimore ka paraparë një rënie të ekonomisë me 4.5 për qind në skenarin më të mirë, për shkak të ndikimit të pandemisë së coronavirusit.

Ndërkaq parashihet se situata mund të përkeqësohet, nëse recesioni vazhdon dhe ekonmia të bie deri në mbi 11 për qind.

“Ekonomia e Kosovës parashihej të rritej me rreth 4 për qind në vitin 2020; mirëpo, për shkak të shpërthimit të COVID-19, ekonomia tani pritet të pësojë një rënie prej 4.5 për qind përkrah uljes së eksporteve të shërbimeve dhe të investimeve publike e private”, thuhet në raportin e Bankës Botërore, të cilin e posedon Gazeta inFokus.

Kjo vetëm sipas skenarit bazë të parashikimit, i cili supozon se pandemia prek vetëm tremujorin e dytë, dhe aktiviteti ekonomik fillon e gjallërohet në gjysmëvjetorin e dytë.

Por, parashikimi më pesimist supozon se masat frenuese nuk hiqen plotësisht deri në gusht, dhe rimëkëmbja fillon vetëm në tremujorin e katërt, parasheh që Kosova të futet në një krizë të thëllë të pa parë që nga viti 1999 kur vendi ishte në luftë./Gazeta inFokus/

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-