Sport

⚽️ Ja çfarë thotë Igli Tare për himnin e Kosovës

Autori: Gazeta inFokus 15:04 | 08 May 2017

Drejtori sportiv i Lazios, Igli Tare, ka deklaruar se kombi shqiptar duhet ta ketë një kombëtare në futboll, derisa ka thënë se e ka të vështirë ta dëgjojë himnin e Kosovës.

Në një intervistë për emisionin “2 me 1” të RTV 21, Tare ka thënë se e ka të vështirë t’i shoh futbollistët me etni shqiptare në një kombëtare tjetër, duke iu referuar Kosovës.

“Nuk kam asgjë kundër përfaqësimit të futbollit kosovar me kombëtare, mirëpo kam diçka kundër sepse për mendimin tim duhet të jetë një kombëtare që e përfaqëson kombin shqiptar. E kam të vështirë ta dëgjoj himnin e Kosovës ose ta shoh ndonjë lojtar shqiptar me ngjyra të tjera”, deklaroi Tare.

Tare ka treguar arsyen përse mendon se bashkimi i dy përfaqësueseve do të ishte më i suksesshëm.

-Advertisement-

“Do të ishte më se e vlefshme edhe për kombin tonë që të kishim një përfaqësuese të fortë që përfaqëson të gjithë kombin shqiptar, dhe ajo do të ishte Shqipëria”, ka thënë ish-futbollisti i kombëtares shqiptare.

Tare ka zhvilluar 60 ndeshje me kombëtaren shqiptare, derisa ka shënuar 10 gola.