Lajme

Zbulohet kush nga të zgjedhurit për administratën e Donald Trump u kërcënua me bombë

Autori: Gazeta inFokus 07:46 | 28 November 2024

Kërcënimet me bombë për disa nga të emëruarit e kabinetit të presidentit të zgjedhur Donald Trump, janë konfirmuar edhe nga FBI. Në një deklaratë, FBI njoftoi se është në dijeni të kërcënimeve të shumta me bomba dhe incidenteve të sulmit që synojnë të emëruarit e administratës Trump.

Republikanja e Nju Jorkut, Elise Stefanik, të cilën Trump e ka emëruar si ambasadore të SHBA-së në Kombet e Bashkuara, tha se ajo vetë dhe familja e saj ishte në shënjestër të një kërcënimi me bombë. Zyra e Stefanik tha se kongresmenja u informua për kërcënimin me bombë ndërsa po udhëtonte me bashkëshortin dhe djalin e saj trevjeçar nga Uashingtoni në Nju Jork për Ditën e Falënderimeve.

Policia e Nju Jorkut konfirmoi për partnerin amerikan të BBC-së, CBS, se shtëpia e të emëruarit të Trump për sekretarin e tregtisë, Howard Lutnick, kishte marrë gjithashtu kërcënime. Lee Zeldin, të cilin Trump e ka emëruar për t’u bërë administrator i Agjencisë për Mbrojtjen e Mjedisit, po ashtu deklaroi se ishte përballur me kërcënime.

-Advertisement-

Republikani nga Florida, Matt Gaetz, i cili largua nga kandidimi për t’u bërë prokuror i përgjithshëm i SHBA, ishte gjithashtu në shënjestër. Zyra e sherifit në kontenë Okaloosa të Floridës konfirmoi se kërcënimi me bombë kishte në shënjestër një adresë në qytetin e Niceville në të cilin Gaetz dikur jetonte dhe ku aktualisht jeton një nga familjarët e Gaetz. Kutia postare e shtëpisë u kontrollua dhe nuk u gjet asnjë pajisje. Nga kontrolli i zonës po ashtu nuk u zbulua asgjë.

Fox News ka raportuar gjithashtu se John Ratcliffe, kandidati i Trump për të qenë drejtor i CIA-s dhe kandidati për sekretarin e mbrojtjes Pete Hegseth ishin gjithashtu në shënjestër të kërcënimeve. Policia po heton kërcënimet e ndodhura mbrëmjen e së martës dhe mëngjesin e së mërkurës.

Subscribe në YouTube: GAZETA INFOKUSI