Lajme

Vuçiq e akuzon Kurtin për “mashtrime”: E bëri një truk të mirë, por jetëshkurtër

Autori: Gazeta inFokus 19:30 | 27 October 2023

Presidenti i Serbisë, Aleksandar Vuçiq, ka thënë se kryeministri i Kosovës, Albin Kurti, ka bërë një truk të mirë dje gjatë takimit me liderët evropianë, por sipas tij, truku do të jetë jetëshkurtër dhe nuk do t’i funksionojë më.

Vuçiqi i ka cilësuar “mashtrime” ato që ka bërë Kurti në takimin me kancelarin gjerman Olaf Scholz, presidentin francez Emmanuel Macron, kryeministren italiane Giorgia Meloni dhe përfaqësuesit e BE-së, Miroslav Lajçak e Josep Borrell.

Duke komentuar zhvillimet e djeshme në Bruksel, Vuçiqi ka thënë se Kurti hodhi idenë e nënshkrimit të tre dokumenteve sepse e dinte që Serbia nuk do të nënshkruante.

-Advertisement-

“Kurti bëri një truk të mirë, por jetëshkurtër dje. Ai e provoi më parë, por dje ishte hera e fundit që e bëri sepse nuk mendoj se mund të kalojë më. Ishte i pari që pati një takim me liderët e BE-së, e më pas me Borrell dhe Lajçakun. I ka paraqitur idenë, të nënshkruajmë të tre dokumentet. Bëhet fjalë për dy marrëveshjet, në Bruksel e Ohër. E propozoi sepse e dinte që Serbia nuk do ta pranonte. Ai nuk është gati të themelojë Asociacionin. Ai nuk do të përmbushë gjithçka, është e qartë se ishte një truk për të blerë kohë”, ka thënë ai në TV Pink të premten.

Vuçiq beson se kjo është një mundësi që Kurti të fitojë kohë dhe të vazhdojë persekutimin e serbëve.

“Ai nuk do të bëjë asgjë, e them paraprakisht, siç e kam thënë qindra herë”, ka shtuar presidenti serb.

Siç thotë ai, serbët mund të “flenë të qetë”.

“Ne do të vazhdojmë të ruajmë stabilitetin dhe të ndihmojmë popullin tonë në Kosovë”, theksoi ai.

Vuçiqi ka paralajmëruar se së shpejti pret një vizitë të madhe nga BE-ja.

“Besoj se do të jetë një takim në nivelin më të lartë. Besoj se do të vazhdojmë bisedimet, për ne BE-ja është partneri kryesor, partneri ynë më i rëndësishëm, prandaj besoj se do të vazhdojmë bashkëpunimin”, ka thënë Vuçiq.

Subscribe në YouTube: GAZETA INFOKUSI
Etiketa:
Çka do të thotë të gatuash shqip?
-Advertisement-

Të tjera

Fokusi

lajme